Jorge Otero: «O equipo foi de menos a máis, pero non acabamos contentos»

pablo penedo VILAGARCÍA / LA VOZ

VILAGARCÍA DE AROUSA

Martina Miser

O adestrador do Arousa salienta a necesidade de que o seu conxunto sexa máis contundente a nivel defensivo na segunda volta

16 ene 2022 . Actualizado a las 05:00 h.

O Arousa completou a semana de parón coa vista posta xa no regreso á competición o vindeiro sábado, no campo do Arenteiro, no que abrirá a segunda volta da Liga de Segunda División R.F.E.F. O seu adestrador, Jorge Otero, fai balance do feito polo seu equipo na primeira parte da temporada, satisfactorio, pero ao tempo inconformista.

—Pois xa van aló 17 xornadas de Liga. Logo de xogar contra todos os seus rivais, que balance fai da primeira volta do Arousa?

—Ben, pois… Creo que é un bo balance. O equipo deu a cara en todos os partidos, estivo a un moi bo nivel; non sería descabellado que tivese algún punto máis. Aínda así, non acabamos contentos. Estamos nunha situación un pouco na que se esperaba, dada a igualdade que hai. O equipo foi de menos a máis e nos últimos partidos creo que os resultados non nos acompañaron para todo o bo traballo que se fixo. Si que é certo que temos que seguir mellorando. Espéranos unha segunda volta moi competida, podes gañar con calquera pero perder tamén con calquera, con dous equipos un punto por enriba, Adarve e Pontevedra. A partir de agora os puntos van ser importantísimos, se cabe inda máis. A igualdade fará que ata finais da Liga non estea nada decidido. Pero creo que estamos no bo camiño.

—E todo isto, que nota lle merece?

—O equipo estivo moi ben, repito, na maioría dos partidos. O equipo quere crecer. O parcial aprobámolo con boa nota, pero queda xuño, cando se dan as notas definitivas. Espero que o equipo vaia a máis. Para todos é a estrea nunha nova categoría. Hai ambición e os futbolistas queren ser partícipes na consecución do obxectivo, permanecer e conseguir os puntos necesarios canto antes.

—Sorprendido coa categoría ou está a ser o que imaxinara antes de comezar?

—Quizais cos equipos que todos esperabamos que estivesen arriba porque ese era o seu obxectivo e non están ou están moi lonxe, como o Salamanca ou o Coruxo, equipos cun potencial tremendo; pero a categoría é dificilísima. A medida que foi avanzando a temporada vemos que é difícil gañar. Polo que dicía antes, hai moitísima igualdade. Hai moi poucos puntos de diferenza entre os de arriba e os de abaixo. Hai equipos con moito potencial e bos futbolistas, con presupostos altos e aos que lles costa gañar.

—Dezaoito goles a favor e un máis en contra. Eses 19 tantos encaixados sinalan a defensa do Arousa como a quinta máis fráxil da Liga. Que está fallando?

—Si. Ese é un aspecto que temos que mellorar. O equipo empezou con poucas ocasións, non conseguiamos chegar, pero estabamos defensivamente fortes. E agora é un pouco ao revés, creamos ocasións, pero defensivamente, en momentos puntuais do partido, fáltanos contundencia, un pouco máis de intensidade defensiva, e iso está a penalizar demasiado o traballo que está a facer o equipo. É algo que temos que traballar e mellorar, porque aí creo que vai estar a clave. Esa solidez defensiva é algo que temos que recuperar e temos que seguir insistindo niso.

—Entendo que de aí vén o seu desexo de poder reforzar o cadro de xogadores cun novo defensa?

—Si, esa é un pouco a idea que temos. Imos ver se pode ser, se entra dentro das posibilidades do club. Pero o aspecto defensivo non é só un tema da zaga, é de todo o equipo. Non podes defender só con catro futbolistas. Aparte de que poidamos incorporar algún novo xogador.

—O certo é que a zaga é a liña con menos efectivos específicos no equipo. Seis sobre o papel, cinco descontando a Álvaro Denis, o único futbolista do Arousa que pecha a primeira volta sen xogar un só minuto. A situación do malagueño parece un luxo que nin un club modesto nin un xogador Sub-23 poidan permitirse nunha categoría profesional…

—Si, ben. Álvaro é un futbolista que é verdade que non está tendo opcións. Ten que seguir esperando. É un chaval cun comportamento excepcional. É un tema técnico, única e exclusivamente.

—No polo oposto, vemos a un Pedro Beda de menos a máis...

—Si. Custoulle entrar un pouquiño no equipo. Seguiu insistindo. Teño falado con el en infinidade de ocasións. É un futbolista moi importante para nós, non temos outro coas súas características. Un xogador posicional, que nos dá esa pausa necesaria. Quizais non está facendo goles como outros anos, pero o seu traballo para o equipo é un moi bo. A todos nos gustaría que levara máis goles dos que leva. Pero ten que ser un futbolista importante na segunda volta.

—O equipo protagonizou varias series de resultados dispares. Atribúeo a certo punto de irregularidade, a unha cuestión de calendario? Está contento coa liña mantida?

—Si. Quizais si. Quizais faltou ter algo máis de regularidade en momentos determinados. Cadraron bos partidos e partidos non tan bos. Pero a liña foi de menos a máis. Despois, tamén houbo algún resultado que nos poida parecer enganoso. O día de Compostela, o día de Coruxo, o día de Langreo creo que o equipo mereceu máis: tamén contra o Navalcarnero sumamos 3 puntos cando igual mereciamos un empate. Pero si é certo que na casa mantivemos unha moi boa liña cuns resultados que non se axustaron aos nosos méritos. Pero esas sensacións e merecementos hai que traducilos en puntos, evidentemente. Faltounos esa sorte que fai falta en todo deporte. Pero repito que a liña do equipo foi de menos a máis, e esperamos que siga así.

—En Carballo tocoulle a ingrata experiencia de ter que marchar expulsado á grada no medio do partido co Bergantiños. En que medida influíu a arbitraxe na puntuación do Arousa nesta primeira volta?

—É un tema sobre o que non teño nada que dicir. Si que é certo que houbo certas decisións que nos puideron prexudicar, pero ao longo da temporada iso equilíbrase. Iso non pode ser unha desculpa, non podemos agarrarnos a iso, porque estariamos facendo mal. Nós temos que traballar o que podemos controlar, ser máis regulares, máis agresivos, máis contundentes en determinados momentos. Inda que si é certo que nesta primeira volta estamos en debe no tema arbitral. Pero isto é fútbol.

—O Arousa aparece na zona media-baixa da clasificación, pero o certo é que está á mesma distancia da zona de promoción de ascenso ca dos postos de descenso, 4 puntos. A que aspira o seu equipo na segunda volta?

—A tentar gañar o próximo partido, que é co Arenteiro. Esa é a nosa idea, o noso obxectivo agora mesmo. A inicios da temporada a idea clara era salvarse, consolidar a categoría, que os futbolistas deran un paso máis e quedar o máis arriba posible. Pero non podemos desviar a atención máis aló do vindeiro partido.