A frota da proba fará esta fin de semana a súa tradicional costeira de ida e volta entre a Escuela Naval Militar de Marín e o peirao deportivo de Vilagarcía de Arousa
12 may 2021 . Actualizado a las 05:00 h.A Regata Trofeo Almirante Rodríguez Toubes de Cruceiros poderá vivir, esta fin de semana, as súas vodas de prata, que un ano atrás lle foran vedadas no medio do confinamento domiciliario no primeiro estado de alarma en España. A proba, cunhas 30 embarcacións de clubs galegos, comezará o sábado ás 11.30 horas con saída na Escuela Naval Militar de Marín para cubrir as 25,5 millas ata o peirao deportivo de Vilagarcía, para facer a frota o percorrido inverso na mañá do domingo.
Ademais de ser puntuable para a Copa Galicia de Clubs, esta edición, presentada onte no Real Club de Regatas Galicia de Vilagarcía, decidirá tamén o gañador absoluto do Trofeo Juan Sebastián Elcano, conmemorativo do quinto centenario da primeira circunnavegación á Terra.