Aragonés, Jacobo García, Andrés López, Meaños e Pedro Muñoz, candidatos a Mellor Deportista Vilagarcián 2018

Celestino Brianes será recoñecido cunha Mención de Honra, e con Mencións Especiais o Atlético Arousana Ju Santórum, Sandra Estrada, o Torneo EncestaRías, Martina Oubiña Miser e Garavilla


vilagarcía / la voz

A XXIX Festa do Deporte Local de Vilagarcía xa coñece o nome dos cinco candidatos que o seu xurado elexíu para a escolla do premiado como Mellor Deportista do Ano. Unha selección na que se tiveron en conta os méritos colleitados ao longo da tempada 2017/18 e do ano pasado, en función da estrutura dos calendarios de cada disciplina deportiva. Jordi Aragonés Posse, Raquel Meaños Asensi, Andrés López Torres, Jacobo García García e Pedro Muñoz Fole. Un deles subirá o venres 13 de decembro ao estrado do Salón García a recoller o máximo recoñecemento.

Para Aragonés e para Meaños sería engordar o seu historial na Festa do Deporte Local de Vilagarcía, tras recibir os premios das dúas anteriores edicións. O preparador físico do Wisla Can Pack Cracovia de Polonia volve aparecer no listado de candidatos pola cita anual que desde o 2013 mantén cos grandes podios internacionais en calidade de integrante da selección española feminina de baloncesto; no 2018, bronce no Mundial.

A atleta do Valencia Esports reuníu o ano pasado os subcampionatos de España Sub-20 de pista cuberta e ao aire libre dos 800 metros, e a súa estrea no panorama internacional dun deporte tan híper competitivo como o atletismo, no Mundial da mesma categoría.

As credenciais de Andrés López para o premio a Mellor Deportista Local inclúen os títulos nacionais de duatlón, de acuatlón, de triatlón esprint e de triatlón cross da súa categoría de idade de veteráns.

E se López é o nominado de maior idade, Jacobo García é o máis novo. O regatista do Real Club Náutico Sanxenxo opta ao galardón como campión de Europa e do Mundo Sub-17 da clase preolímpica 420 no 2018.

Nese mesmo ano Pedro Muñoz Fole colgábase as medallas de ouro que o acreditaron como mellor especialista de kenpo do mundo en combate semikenpo de menos de 70 quilogramos e en kata, ambos na categoría Sub-21.

Os cinco candidatos a Mellor Deportista Local 2018 serán os últimos en subir ao estrado do Salón García. Na gala do 13 de decembro serán precedidos polas persoas ou representantes dos profesionais, organizacións, clubs e empresas recoñecidas coas Mencións Especiais acordadas este ano polo xurado da Festa do Deporte Local.

Celestino Brianes Lojo será lembrado coa Mención de Honra a Título Póstumo por toda unha vida dedicada á promoción de múltiples disciplinas deportivas en Vilagarcía, tanto en clubs como desde a propia Fundación de Deportes. A A.D.C. EncestaRías levará a Mención Especial á Organización de Eventos pola cuarta edición do seu torneo ACB de pretempada, Sandra Estrada, do C.X.R. Vilarousa, a Técnico Deportivo, José Ramón Santórum, Ju (Os Ingleses), a Directivo, Garavilla S.L, a Empresa, e o Atlético Arousana á Traxectoria cando cumpre 25 anos de existencia.

Mención especial á redactora gráfica de La Voz de Galicia Martina Miser

A Festa do Deporte de Vilagarcía inclúe unha Mención Especial dedicada a recoñecer o traballo dos profesionais que informan á cidadanía do esforzo e dos logros dos seus deportistas. Martina Oubiña Miser, reporteira gráfica de La Voz de Galicia, recollerá o 13 de decembro dito galardón, tras inmortalizar coas súas fotografías boa parte dos grandes éxitos colleitados polo deporte vilagarcián os últimos 20 anos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Aragonés, Jacobo García, Andrés López, Meaños e Pedro Muñoz, candidatos a Mellor Deportista Vilagarcián 2018