Teófilo Comunicación edita un coidado facsimil do mapa da costa arousá que Fontán soñou en 1828
09 oct 2018 . Actualizado a las 21:31 h.Cando en 1828, logo de once anos percorrendo o país a pe e en burro para medir e triangular cada lugar, cada parroquia, Domingo Fontán (Portas, 1788-Cuntis, 1866) se puxo a debuxar por fin a súa Carta Xeométrica de Galicia, o primeiro que plasmou foi a ría de Arousa. Nese mesmo ano, en 1828, publicábase o plano do mar de Arousa, o primeiro e máis detallado retrato do noso mar, que agora, douscentos anos máis tarde, vén de recuperar Teófilo Comunicacións en forma de facsímil. O mapa, que xa está á venda, preséntase no interior dun cilindro no que se relatan os principais chanzos da vida do xenial xeógrafo, matemático e político galego. O home que legou a Galicia o seu primeiro mapa moderno, expresado en metros no canto das varas castelás que dominaban as medidas do XIX.
O plano da ría presentouse onte, no centro sociocultural de Vilaxoán. Teófilo xoga alí, literalmente, na casa. Participou no acto o secretario xeral de Política Lingüística, Valentín García, quen glosou de xeito didáctico a figura de Fontán, inexplicablemente esquecida para o gran público. Tamén Miguel Santalices, presidente do Parlamento de Galicia, e o alcalde de Vilagarcía, Alberto Varela. Pero, sobre todo, as voces da coral Vilaxoán Canta e a presenza de Paquita, a súa veciña máis lonxeva, con cen anos cumpridos. Horas antes, a universidade e a Real Academia de Ciencias celebraban a Fontán, a quen se lle dedicou o día da Ciencia en Galicia. A mellor homenaxe é este mapa.