Xurxo Abuín: «Algúns aproveitan as multas para facer negocio coa limpeza do monte»

Presidente da Comunidade de Montes de Rubiáns desde hai nove anos, primeiro directivo dunha Mancomunidade de Montes de Vilagarcía de Arousa que vén de cumprir o seu primeiro ano agrupando o 70 % das entidades do sector da localidade, Xurxo Abuín (1954) é unha voz autorizada para falar sobre as urxencias e as inseguridades dos propietarios forestais a raíz das esixencias da Xunta en materia de limpeza de fincas, pero tamén das recentes modificacións na Lei de Montes. En ambos casos é sumamente crítico coa política do goberno de Feijoo.

-Limpeza de fincas a 50 metros de núcleos urbáns, rurais e urbanizables para a prevención dos lumes forestais, con multas de ata 3.000 euros desde o 1 de xuño...

-Estas normas non son novas. Figuran na lei de Montes do 2012. Que ocorre, que como moitas cousas que se lexislan, non se esixe o seu cumprimento. Pero este ano as declaracións do presidente da Xunta e da conselleira de Medio Rural deixan claro que se vai esixir o cumprimento desas normas a partir do 1 de xuño. Ameazan con multas que poden chegar aos 3.000 euros. Desde a Xunta non se fixo un traballo previo de información exhaustiva entre os propietarios. No mundo no que vivimos, no que calquera usa medios tecnolóxicos, sería moi fácil que a Xunta comunicase calquera modificación sectorial ás comunidades de montes cun correo electrónico, que non custa nada, e é inmediato. Parece que aquí prima o escurantismo. Non se nos informou de nada ás comunidades. Se a comunidade está na Organización Galega de Comunidades de Montes, ou da Asociación Forestal Galega, pódenche chegar as noticias. Pero se non, corres o risco de non enterarte de nada. Esta semana falaba cun rapaz que ten propiedades forestais, e díxome que sabe que ten que cumprir coa norma, pero que se ve imposibilitado de tirar unha árbore; para iso hai que ser profesional. Tentou contratar un fragueiro para que lle talase a madeira e lle limpase o monte. Pero os profesionais están tan saturados, que non se poden comprometer a facerche o traballo nun prazo. E logo, comentábame, algún diche, sácoche a madeira, pero non cha pago, lévoma gratis. Algúns aproveitan para facer negocio.

-En zonas de Galicia deuse un aumento considerable da contratación de empresas do sector para a limpeza de fincas situadas no límite das franxas de seguridade fixadas pola Xunta. ¿Vivíuse ese incremento na comarca?

-Resulta evidente. Colles o coche, das unha volta por Rubiáns, por Cornazo, por Baión... polas comunidades de montes da zona, e por fincas de particulares, e ves que se están facendo obras de limpeza, de tala, e que se están facendo todas á vez. E iso é polo cumprimento da norma.

-¿Como está a situación hoxe en Vilagarcía e en Arousa? ¿Chegamos ao fin do prazo da Xunta en perfecto estado de revista?

-Non. De ningunha maneira. Imposible. Era materialmente imposible chegar ao 31 de maio co cumprimento estrito da normativa. Porque as cousas levan o seu tempo. Hai que contratar persoal para a limpeza, e iso require tempo. Lexislar é moi fácil. As leis deberan ser razoables. Se iso se lles comunicara aos propietarios con seis meses de antelación, pódese cumprir, pero se non cho comunican, é imposible. A xente estáse a enterar agora pola prensa. O cadro de distancias da Xunta está en vigor desde o 2012, pero nunca se esixíu o seu cumprimento. Esta aí, pero á maior parte dos propietarios de montes nunca lles chegou. Leis en Galicia non sei cantas sairán cada mes, pero eu non me entero de case ningunha. E iso pásalle ao común da xente.

-A franxa de seguridade non é unha novidade na normativa contra o lume. Descargar nos concellos o seu control, facultándoos desde o 1 de xuño para limpar as fincas abandonadas repercutíndolles os gastos aos propietarios, si. ¿Cónstalle que concellos da comarca vaian actuar de oficio?

-Descoñezo se algún concello vai actuar. Non me parece razoable. Como sempre, descárgase nos concellos o capítulo sancionador. Paréceme unha barbaridade.

«O balance do primeiro ano da Mancomunidade de Vilagarcía é moi poisitivo»

-¿Que balance fai deste primeiro ano da Mancomunidade de Montes de Vilagarcía?

-Moi positivo. Penso que xuntar a maioría das comunidades de Vilagarcía nunha mesa, reunirnos cada dúas, tres, catro semanas, e buscar obxectivos comúns é positivo. O ano pasado fixemos un dossier sobre os vertedoiros incontrolados nos nosos montes e envióuselle á Xunta, a fin de que tomase cartas no asunto. Lamentablemente, non o fixo. Ás veces os vertedoiros de lixo son focos de inicio de incendios. Tamén, en colaboración co BNG, conseguimos que no orzamento local se incluíse unha partida para limpeza de montes veciñais, e para formación de persoal que poida traballar niso. Foron 70.000 euros, que se esgotaron, e máis que houbera. Cubriron os custes do estudo que fixo a Mancomunidade para ver as zonas prioritarias de limpeza, e a limpeza de moitos dos montes veciñais de Vilagarcía. Este ano hai unha nova convocatoria de axudas, e en calquera momento o Concello fará públicas as bases; estamos facendo un novo estudo, determinando as zonas máis sensibles aos incendios para investir canto antes a partida nelas.

---

---

---