O líder non lle deu opción ao Cocinas Bulthaup

O Cambados T.M. aproveitou as baixas do Pontevedra para gañar 0-6


vilagarcía / la voz

Cara e cruz para os dous equipos de cabeceira do tenis de mesa arousán. Co Vilagarcía Cocinas Bulthaup caendo con contudencia a mans do líder da Superdivisión, o DKV Borges, mentres o seu veciño Cambados T.M. daba a sorpresa desbancando, que non relevando, o Visit Pontevedra do primeiro posto do Grupo 1 da División de Honra.

Por 0-4 caeu o Vilagarcía Cocinas Bulthaup no paso pola rúa Castelao do DKV Borges. Un resultado que cobra toda a súa dimensión cando miramos o detalle, e vemos os doce xogos a un detrás do marcador final. Co ucraíno Sergei Nigeruk asinando o xogo da honra arousán no primeiro duelo do encontro, ante Fan Chuangwei, con 11-9, 11-13, 11-5 e 11-4. Despois virían as vitorias catalanas de Oriol Monzo sobre Andrés Guillermo Correa, 11-6, 11-8 e 11-7, de Marc Duran ante Ramón Tubío Villanueva, 11-2, 11-2 e 11-5, e novamente de Fan Chuangwei con Andrés Guillermo Correa diante, 11-7, 11-6 e 11-3.

Tras o seu pinchazo, o Vilagarcía Cocinas Bulthaup ve situarse o San Sebastián de los Reyes a dous puntos, co cadro arousán sexto ocupando o último posto de acceso a competición europea a vindeira tempada, empatado a 14 puntos co A.D. Vincios.

Pola súa banda, o Cambados T.M. soubo sacar proveito das ausencias dos dous xogadores arxentinos do Visit Pontevedra para gañar 0-6, cun global de 18 xogos a 4. José Manuel Ruíz superou 3-1 a Ignacio Fernández, Fernando Padín 3-1 a Cristofer Santiago, Rafael Taboada 3-0 a Brais González, Ruíz 3-1 a Santiago, Taboada 3-1 a Fernández, e Padín 3-0 a González.

Con este marcador o Cambados T.M. colócase cuarto na clasificación con 16 puntos, a tiro de catro do A.D. Collado Mediano, que pecha no terceiro posto a zona con dereito a disputar a vindeira fase de ascenso á Superdivisión a falta de nove xornadas para a conclusión da Liga.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O líder non lle deu opción ao Cocinas Bulthaup