Valga despide a María Tarrío, unha pandereteira de 103 anos que compartíu a sua memoria musical con toda Galicia
VALGA
O enterro da veciña de máis anos da localidade será este venres pola tarde
16 abr 2026 . Actualizado a las 20:50 h.Valga despediu este xoves a María Tarrío Campaña, a veciña de máis anos do municipio: cumpriu, no pasado mes de setembro, os 103. A capela ardente da avoa da localidade atópase na sala 3 do tanatorio municipal, e este venres terán lugar os actos fúnebres, con saída dende o tanatorio ás catro e cuarto cara a igrexa parroquial de Santa Columba, onde se celebrará o funeral e, seguidamente, recibirá sepultura no cemiterio parroquial.
María Tarrío naceu no seo dunha familia humilde de Moldes, aínda que vivía en Eiras, sendo a mediana de sete irmáns. Formou unha extensa familia de sete fillos, doce netos e once bisnetos. Como a maioría de mulleres da súa época, dedicou a súa vida ao coidado do fogar e ás tarefas do campo e, ademais, foi costureira. E aínda lle quedaba tempo para participar en seráns, ruadas e xuntanzas, antano habituais nas aldeas e nas que non podían faltar as gaitas e coplas. María foi pandereteira e contribuíu a transmitir cultura popular galega a recolledores de cantares e estudosos da pandeireta. De feito, foi unha das homenaxeadas polo Concello no último Día das Letras Galegas pola súa contribución a preservar a poesía oral e a cultura popular de Galicia.
O alcalde, José María Bello Maneiro, manifestou a súa tristura polo pasamento da centenaria e traslada, no seu nome e no de toda a Corporación e veciñanza, o péseme aos seus familiares e achegados.