Valga e Xunta dan un novo paso para conseguir a praia fluvial na lagoa rehabilitada de Porto Piñeiro

A nova fase das obras de rexeneración ambiental da lagoa de Porto Piñeiro, en Valga, está en camiño. O director de Turismo de Galicia, Xosé Merelles, e o alcalde, José María Bello Maneiro, fixeron oficial o levantamento da acta de replanteo.

Nesta actuación investiranse 574.990 euros financiados con fondos do programa europeo Next Generation xestionados a través do xeodestino turístico Mar de Santiago. A sinatura permite a Covsa, a empresa adxudicataria, dar comezo aos traballos que inclúen a creación dunha praia artificial.

Xosé Merelles manifestou que a obra «pon en valor unha zona que estaba degradada pola actividade mineira e que se recuperará para convertela nun espazo natural e nun reclamo turístico». Pola súa parte, Bello Maneiro agradeceu o aporte financeiro e sentenciou que o obxectivo do goberno local é convertela nun espazo de referencia ambiental e social cun proxecto valorado en máis de 14 millóns de euros.

Ademais da praia fluvial, a planificación inclúe o acondicionamento dunha zona de baño ao aire libre e unha piscina, un espazo de usos recreativos e de ocio con xogos de area e auga, unha zona deportiva e equipamento ciclista. Tamén están previstas unha cávea natural no bordo da lagoa cun escenario flotante e cabanas nas que poder aloxarse.

No ano 2023 executouse a primeira fase na zona sur da lagoa e, a finais de 2024 comezaron os traballos de colocación do peche de seguridade perimetral. Agora iniciaranse as obras da praia e, no que resta do ano, espéranse levar a cabo outras fases: o remate das sendas ciclistas e peonís (cunha inversión de 615.000 euros do programa provincial Pon2030) e a construción dunha piscina e acondicionamento dos terreos adxacentes (700.000 euros da Deputación e 202.000 euros correrán a conta do Concello).

---

---

---