O orzamento elévase a 737.000 euros e a previsión da Xunta e desenvolver a actuación este ano
26 ene 2022 . Actualizado a las 14:05 h.A Xunta recibiu sete ofertas de empresas para executar as obras dunha nova senda na estrada PO-548, no municipio de Valga, licitadas por un importe de case 737.000 euros. Das 7 ofertas presentadas, unha delas está están conformadas por UTE, o que supón un total de oito empresas.
A nova senda dará continuidade á que xa existe nesta na vía autonómica e permitirá aos peóns que se dirixen á igrexa de Santa Columba de Cordeiro, ao colexio Xesús Ferro Couselo e ao pavillón polideportivo municipal poder facelo dun xeito seguro.
A Consellería de Infraestruturas e Mobilidade prevé desenvolver esta actuación durante este ano, xa que conta cun prazo de execución de seis meses. O orzamento total destinado a esta intervención ascende a 780.000 euros, tendo en conta o pagamento das expropiacións dos 20 predios necesarios para executar a actuación. Os actos expropiatorios están xa convocados para os vindeiros meses de marzo e de maio.
Concretamente, o acto expropiatorio de levantamento de actas previas está fixado para o vindeiro día 11 de marzo, das 10 ás 13.40 horas no salón de plenos do Concello de Valga. Posteriormente, convócanse os titulares dos terreos á formalización das actas de ocupación, logo do aboamento dos depósitos previos, o día 18 de maio, no mesmo lugar e horario.
As obras executaranse pola marxe esquerda ata o cruce coa pista municipal que lle dará continuidade. Requirirá da instalación dunha pasarela metálica na proximidade da igrexa de Santa Columba de Cordeiro de grandes dimensións, 21 metros de lonxitude e case 3 metros de anchura, sobre o río Louro.
Tamén se ampliará o paso sobre ese río, aumentando a plataforma da calzada cun forxado de chapas metálicas sobre trabes e construíndo catro muros de contención para asentar e fixar o terreo cunhas condicións idóneas de seguridade.
A intervención compleméntase coa reordenación do tráfico na intersección no punto quilométrico 3+910, onde se prevé executar unha pequena glorieta que permita o cambio de sentido, impedindo a realización de movementos que provocan situacións de risco e reforzando a seguridade viaria. A intervención contará co cofinanciamento de fondos europeos REACT-UE.