María Bouzas pasa a ser a veciña máis lonxeva de Valga con 104 anos

No clube dos centenarios están tamén María Josefa Senín, que ten 101 anos, e Hipólito Cerqueiras Pardal, que o domingo cumpriú cen


Valga

Valga segue dando mostras da boa saúde dos seus maiores. María Bouzas Senín, a veciña máis lonxeva do municipio, cumpriu este mércores 104 anos. Con motivo do seu aniversario o alcalde, José María Bello Maneiro, e as concelleiras Carmen Gómez e Begoña Piñeiro visitárona este mediodía no seu domicilio de Cerneira (Setecoros). Trasladáronlles as felicitacións de todos os veciños e entregáronlle como agasallos un ramo de rosas, doces e unha torta na que María soprou as velas co número 104.

Con máis dun século de vida é todo un exemplo de vitalidade. Os anos semella que non pasan por ela e mantense igual de faladora e enérxica, segundo informan desde o Concello. Ela soa se ergue e se viste polas mañás e mantén o costume de dar paseos, axudándose cun andador, polos arredores da vivenda, na que reside coa súa filla e o seu xenro. María vive con incredulidade a situación de pandemia polo coronavirus. «Vivín varias guerras, pero coma isto non vin nada. En 104 anos non acordo que non houbera misa en Setecoros», comentaba co alcalde e as concelleiras referíndose á suspensión dos servizos relixiosos na parroquia durante o estado de alarma.

Cunha filla, dous netos e tres bisnetos, María Bouzas rodearase esta fin de semana de todos os seus achegados para celebrar con eles o seu aniversario.

Valga conta, ademais, con outros dous veciños centenarios: María Josefa Senín, de Reguengo, que ten 101 anos, e Hipólito Cerqueiras Pardal, de Moldes, que o pasado domingo cumpriu os cen anos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Tags
Comentarios

María Bouzas pasa a ser a veciña máis lonxeva de Valga con 104 anos