Valga busca as mulleres que decidiron sacar o carné cando conducir seguía a ser «cousa de homes»

O Concello homenaxeará as que obtiveron o permiso antes de 1975


valga / la voz

Achégase o 8 de marzo, o Día Internacional da Muller. E, con ese motivo, estanse a argallar, en todos os rincóns da bisbarra, unha chea de actos reivindicativos vestidos das formas máis diversas. No Concello de Valga adoitan buscar un fío argumental para a celebración do Día da Muller. Non buscan historias refinadas: apostan, máis ben, por recoñecer os méritos cotiás. Eses que son, normalmente, os que marcan diferenzas e abren camiños. Para mostra, o tema escollido este ano polo Concello de Valga, que pretende render homenaxe «a todas aquelas mulleres do municipio que sacaron o carné de conducir antes do ano 1975, ou nese mesmo ano».

Quizais aos máis novos lles sorprenda a temática. ¿Un homenaxe ás condutoras? Pois si. Porque ser condutora non sempre estivo ao alcance das mulleres. Que llo pregunten, se non, ás de Arabia Saudita, que ata o pasado mes de xuño non podían poñerse ao volante sen correr perigo de ser represaliadas.

Na España da ditadura, a cousa non pintaba moito mellor para as mulleres. Daquela, levar o volante do coche -como o da vida- era un privilexio reservado aos homes. E as mulleres máis audaces, que ben por necesidade, ben por elección, decidían tomar o mando dos vehículos, non podían facelo se non tiñan a autorización do seu pai ou do seu home. Por iso, ter sacado o carné antes da chegada da democracia é un mérito que non pode pasar desapercibido. Por esa razón, o Concello de Valga quere focalizar nese feito os actos do 8 de marzo. Pretende, di, «recoñecer ás valguesas que foron pioneiras no mundo da automoción», un espazo que «estivo tradicionalmente dominado por homes, relegando á muller a un segundo plano».

Dende o Concello expresaban onte o seu desexo de que todas as mulleres do municipio que cumpran os requisitos desta convocatoria reciban a homenaxe que tanto merecen. E por esa razón, o alcalde vén de publicar un bando no que solicita a todas elas que, «de formar parte deste grupo», se poñan en contacto co consistorio a través do teléfono 986 559 456. A intención e que todas as que foron, estean no acto de recoñecemento que se celebrará o día 9 de marzo, ás oito da tarde, no auditorio de Cordeiro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Tags
Comentarios

Valga busca as mulleres que decidiron sacar o carné cando conducir seguía a ser «cousa de homes»