A Copa de Ribadumia contará co equipo dubaití de Coira e co Celta Brasov de Charlín

La Voz VILAGARCÍA / LA VOZ

RIBADUMIA

MONICA IRAGO

A organización da primeira edición da Copa Ribadumia de fútbol base fixo onte o seu segundo avance respecto á participación tanto no seu torneo benxamín, do 14 ao 16 de xuño, como do infantil, programado entre o 21 e o 23 do mesmo mes

24 may 2019 . Actualizado a las 12:27 h.

A organización da primeira edición da Copa Ribadumia de fútbol base fixo onte o seu segundo avance respecto á participación tanto no seu torneo benxamín, do 14 ao 16 de xuño, como do infantil, programado entre o 21 e o 23 do mesmo mes, co Campo Municipal da Senra como escenario. Novidades que confirman a amplitude xeográfica que Paco Ozores, ata o ano pasado encargado do Torneo Internacional Cidade de Vilagarcía do Arousa, está a conseguir para o seu novo produto.

Así, o equipo de Ozores confirmou onte para o torneo benxamín os nomes do C.D. Leganés, do equipo da Real Federación Española de Fútbol, do Boavista F.C. portugués e mais do Celta Brasov, a escola rumana do Celta de Vigo que esta tempada evoluciona baixo a dirección do cambadés Blas Charlín. Nomes que se suman aos xa adiantados na primeira comunicación do campionato ribadumiense, Rayo Vallecano, Getafe, Porto F.C., Celta de Vigo, Deportivo da Coruña e CD Lugo.

No tocante á Copa Ribadumia Infantil, o Rayo Vallecano, que está a pelexar co Real Madrid, co Atlético, co Getafe e co Leganés polo título na máxima competición ligueira madrileña, fará dobrete na Senra o vindeiro mes, co Real Valladolid e co equipo da Spanish Soccer School de Dubai que dirixen Míchel Salgado e o vilagarcián Pablo Coira como outras novidades. Súmanse a Vitoria de Guimarães, Boavista F.C., Celta de Vigo e Deportivo da Coruña.

Deste xeito, a día de onte eran xa dez as comunidades autónomas representadas nas dúas Copas de Ribadumia, e catro as nacionalidades, española, lusa, rumana e dubaití.