O Céltiga, obrigado a gañar para aferrarse a un case imposible

Debe vencer o Silva, e que o Porriño derrote o Laracha para agardar a salvación dos equipos que promocionan a Segunda B


A Liga 2018/19 da Terceira División baixa esta tarde o telón, cos seus dez partidos arrincando en sincronía ás seis da tarde. No caso do Céltiga, coa ameaza de poñer punto final a un auténtico drama. O de ver o equipo máis e mellor reforzado do grupo galego da categoría no pasado mercado de inverno camiño da Preferente. Un desenlace altamente probable ata no mellor dos escenarios que poida abrirse á conclusión da trixésimo oitava xornada do campionato: Que os homes de Javi Rey gañen hoxe o seu partido fronte ao Silva no Salvador Otero, e que o pechacancelas, o Porriño Industrial, faga o propio en paralelo na súa visita ao campo do Laracha.

Cuarto pola cola da clasificación con 38 puntos, o Céltiga chega ao partido final abrindo a zona de decenso directo. A súa única posibilidade de salvación pasa por superar o Laracha, xusto un posto por enriba con 40 puntos e o goal avarage particular ao seu favor polo seu triunfo 0-2 no Salvador Otero na primeira volta, e tras o empate sen goles na segunda en terreo coruñés.

De producirse un final feliz, que obriga á vitoria illense e ao éxito dun descendido Porriño Industrial que chega á derradeira xornada con tan só un triunfo a domicilio na tempada, o Céltiga gañaríase o dereito a soñar con que dous dos catro equipos galegos na inminente fase de ascenso á Segunda División B consigan o salto de categoría. Un futurible poucas veces visto no balompé galaico. Non digamos se teñen que ser finalmente tres os ascensos, escenario que se abriría de acabar caendo o Celta B ao posto de promoción de permanencia do Grupo 1 da Segunda B, coa Liga deste último concluíndo tamén hoxe. O técnico local, Javi Rey, xoga tan trascendental encontro sen Jacobo, baixa por acumulación de amonestacións.

Os outros dous equipos do Salnés na Terceira, Arousa e Ribadumia, afrontan pola contra e moi ao seu pesar cadanseu intrascendente final para os seus intereses. O Arousa desprázase ao campo dun Somozas que ocupa o decimoquinto posto na clasificación, a piques de consumar a debacle que para un dos maiores orzamentos da categoría suporía o seu descenso á Preferente. Pacheco, por sanción, é a única baixa no cadro arlequinado. Pola súa banda, o Ribadumia pecha hoxe cinco campañas na Terceira División camiño da Preferente co campión da Liga, o Racing de Ferrol, visitando A Senra. O desexo dos de Luis Carro, ofrecerlle unha boa imaxe de despedida á súa entregada afección.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O Céltiga, obrigado a gañar para aferrarse a un case imposible