O Céltiga pretende fichar entre hoxe e mañá un recambio de primeiro nivel para o vestiario

A directiva manexa unha axenda de catro adestradores con ampla experiencia na Terceira, dous deles tamén na Segunda B


vilagarcía / la voz

O baleiro no vestiario do Salvador Otero tras a dimisión irrevocable de Manolo Núñez na noite do pasado domingo será extremadamente breve. A lo menos, se se cumpren os prazos manexados polo director deportivo do Céltiga, Diego Gondar, que tras tentar sen éxito que o técnico ourensán reconsiderase á súa decisión en quente nada máis finalizar a humillante derrota do equipo illense por 0 goles a 8 a mans do Ourense C.F., pretende non perder un minuto para tentar darlle a volta a unha traxectoria que vén de afundir o conxunto insular na zona de descenso directo. Unha situación que ameaza con cronificarse.

Así, e despois de que o preparador físico do equipo, Pablo, dirixise onte a sesión de recuperación do Céltiga, a intención de Diego Gondar é que o primeiro adestramento técnico e táctico da semana conte mañá á noite xa co relevo de Manolo Núñez.

Sen dar nomes, o director deportivo do club illense explicou que manexa na axenda catro alternativas cun denominador común: Unha ampla experiencia na Terceira División. Dous deles extensiva á Segunda División B.

E isto é así por dous motivos. Porque un equipo que figura antepenúltimo na clasificación cun cadro de xogadores na súa maioría Sub-23 precisa dalguén con cintura para sortear unha crise así, facendo reaccionar os seus homes. E segundo, porque nas oficinas do Salvador Otero non foxen da realidade, plenamente conscientes de que coa actual configuración do equipo non basta para pensar en salvar a categoría.

Como mínimo segue a faltar o mesmo que necesitou Manolo Núñez desde o inicio de Liga, un lateral esquerdo e un home-gol de absoluta garantía; e o adestrador que se fiche debe ter capacidade por si só para, co respaldo económico do club, pescar a lo menos estes dous reforzos aproveitando a inminente reactivación do mercado.

«Impulso anímico» ao Arousa

Os graves problemas do Céltiga contrastan coa recuperación do sorriso nas caras da xente do Arousa. «Hay que estar contento», dicía o domingo o seu adestrador, Rafa Sáez, da vitoria sobre o Arenteiro, coa que os arlequinados cortaban tres semanas sen gañar, con só 5 puntos sumados dos anteriores 21 en xogo. «Esto nos va a dar impulso anímico para afrontar los cuatro partidos que nos quedan de la primera vuelta», sinala Sáez, pendente ata o xoves da evolución da escordadura de nocello pola que Julio Rey se tivo que retirar o domingo do campo antes de tempo, a raíz dunha fea entrada do tamén vilagarcián Fajardo.

Rachar a dinámica no Ribadumia

O que non foi quen de saír da súa crise foi o Ribadumia, coa súa sexta derrota nos últimos sete partidos. Un 3-1 a mans do Silva nunha mestura de decisións arbitrais e mala sorte que levou ao técnico aurinegro, Luis Carro, a declarar que «nunha dinámica boa este partido teriámolo que ter gañado. Sen dúbida ningunha. O máis difícil disto é romper a dinámica».

Semana con tres días de partidos no balompé arousán

A ponte da Constitución ofrece unha intesa semana no fútbol arousán. Con partidos o xoves, sábado e domingo. Na tarde do primeiro día, coa disputa da decimosétima xornada da Liga de Preferente, con estes encontros: Estradense-Vilalonga, Mondariz-Unión Grove, Amanecer-Alertanavia, e Juventud Cambados-Atios. O Arousa xogará o sábado (17 horas) no campo do Laracha. O Céltiga abrirá o cartel dominical ás 12 no feudo do Polvorín, recibindo pola tarde o Ribadumia o Paiosaco, e vivindo a Preferente a súa xornada 18.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

O Céltiga pretende fichar entre hoxe e mañá un recambio de primeiro nivel para o vestiario