Ribadumia e Juventud mídense na Senra, mentres o Arousa o fai co Compostela e co Coruxo
RIBADUMIA
O cadro de Luis Carro xoga o Trofeo Pomarco logo de vencer 0-2 o xoves o Noia, e tras pechar a fichaxe do mediapunta Monchito
28 jul 2018 . Actualizado a las 05:00 h.A pretempada dos equipos do Salnés na vindeira Liga de Terceira mete a segunda marcha esta fin de semana. Se sete días atrás tan só o Ribadumia apostaba por iniciar o contacto co xogo real medíndose na Senra ao Rápido de Bouzas, desta volta os seus veciños Arousa e Céltiga súmanse ao recurso dos partidos de preparación para completar a súa primeira e segunda semana de adestramentos, respectivamente.
O conxunto vilagarcián será, de feito, o que abra desta volta o calendario de amigables. Cun triangular no campo de Praíña, no concello de Teo, coprotagonizando dous dos tres primeiros enfrontamentos de tres cuartos de hora da cita. Ás 18.30 horas, medíndose ao vixente campión do grupo galego da Terceira División e novamente futuro rival directo polas catro prazas de acceso á promoción á Segunda B, o Compostela; e unha hora despois, ao Coruxo, un dos cinco equipos galegos na vindeira edición da Liga da categoría de bronce do balompé español. Será a primeira ocasión que manexe Rafa Sáez para probar un plantel integrado por xogadores na maioría prácticamente descoñecidos entre si, e tamén para testar os seus moitos futbolistas a proba, fundamentalmente procedentes da propia canteira arlequinada.
Ás 20.30 o Ribadumia disputará co Juventud Cambados o Trofeo Pomarco na Senra. Se para o cadro de Edu Charlín trataráse do seu primeiro partido de preparación logo de iniciar a pretempada o pasado luns, no caso do anfitrión falamos do terceiro. O cadro de Luis Carro xogaba o xoves un amigable co Noia en campo rival, con 0-2 final e goles de Cheri e de Teti no segundo tempo. Para José Ramón Rodríguez Fontán, Monchito, a de hoxe será a súa estrea oficial como futbolista do Ribadumia, tras superar un período de proba e convencer a Luis Carro. Mediapunta pontevedrés de 20 anos, incorporouse á pretempada aurinegra tras militar a tempada pasada no Portonovo procedente da canteira do Pontevedra. Del di o seu novo adestrador que «pode xogar por dentro e por fóra, ten calidade, é creativo, e con capacidade para medrar moitísimo; o perfil que buscabamos para substituír a José Filgueira».
O Céltiga pechará a fin de semana futbolística dos Terceira arousáns. Co seu primeiro test mañá, desde as 19 horas no Campo da Bouza de Barrantes, fronte ao Umia de Primeira Galicia.