A centro de acollida de animais de Meis incorpora novos equipos de diagnóstico

la Voz MEIS

MEIS

Rafa Estevez

Carmela Silva incidiu na sustentabilidade do equipamento, que reduce os residuos contaminantes, e no benestar que proporcionará aos cans

28 may 2021 . Actualizado a las 10:36 h.

O Centro de Acollida e Protección de Animais (CAAN) da Deputación de Pontevedra (Meis) é «unha referencia a nivel do Estado en benestar animal, que é a súa sinal de identidade, segundo sinalou a presidenta, Carmela Silva, na visita feita onte ás instalacións para coñecer o novo equipo de radiodiagnóstico veterinario  co que a institución acaba de dotar ao centro, que se converte, «no único que ten un equipamento tan avanzado». Carmela Silva amosou, xunto ao persoal do centro encabezado polo veterinario xefe, José Luis Pedreira, e o deputado provincial Manuel González, os novos equipos cos que se axilizará e mellorará amplamente o diagnóstico e os tratamentos dos animais do CAAN.

A dotación destes equipos dixitais suporá, como explicou a presidenta, «que o diagnóstico sexa máis acertado e tamén un maior benestar animal, xa que os animais non terán que saír do centro para facer as radiografías noutros lugares, senón que en breve tempo podemos conseguir toda a información que nos permita realizar os tratamentos necesarios aos cans e cadelas que aquí temos». Carmela Silva incidiu na sustentabilidade do equipamento, que reduce os residuos contaminantes, e salientou que, máis alá de continuar sendo un centro de referencia, «o máis importante é que os animais aquí acollidos estean nas mellores condicións; creo que é unha obriga e nós temos un forte compromiso neste aspecto». No mesmo senso pronunciouse José Luis Pedreira, que destacou que o equipo dixital «permite complementar en calidade o diagnóstico en imaxe». Hai que lembrar que nas obras de mellora que realizou o pasado ano a Deputación incluíse a reforma da sala de clínica, coa creación dun novo quirófano e unha sala de raios X que é a que agora se completa cos novos equipos.

Excepcional ritmo de adopcións

Carmela Silva destacou na súa visita o traballo que está a realizar o persoal do CAAN e que avalan tamén os datos sobre adopcións que leva o centro de novo este ano. Así, desde xaneiro e ata o 23 de maio saíron cara a un novo fogar 285 cans e cadelas, unha cifra que supón máis do dobre que as do mesmo período do 2020 (133) e tendo en conta que precisamente o pasado ano se acadou o récord de adopcións no centro, con 583.

Rafa Estevez

Das 285 adopcións deste 2021, 1 foi en Portugal e o resto en España. A maioría foron en Galicia (243), e Castela e León (28) e o resto repartíronse entre as comunidades de Madrid (5), Cataluña (3), País Vasco (1) e Castela a Mancha (1). Das galegas, 208 tramitáronse na provincia de Pontevedra, 19 en Lugo, 10 na Coruña e 6 en Ourense. Ata agora o concello con máis adopcións na provincia foi Vigo (44), seguido de Pontevedra (24) e A Estrada (22). Outros municipios cun gran número de adopcións foron Meis (13), Poio (10), Vilagarcía (9) ou Sanxenxo (8).

Potenciar a adopción dos “avós e avoas”

Pese a todo, no centro varios animais que, pola súa idade, teñen a priori menos posibilidades de adopción. Deste xeito, Carmela Silva fixo un chamamento para acadar o reto de dar saída a cadelas como Macarena, de 8 anos de idade e de raza mastín que chegou de Pontecesures en marzo cun corte moi grande na cara do que está recuperada e coa que compartiu a súa comparecencia; “Adia”, unha pastora alemá da mesma idade que tamén está no centro desde hai uns meses, procedente das Neves ou o can “Pitu”, de 10 anos, chegou de Catoira. Ao igual que Paradita, de 8 anos e recollida en Meaño, todos e todas teñen moi bo carácter e esperan ter a mesma sorte que outros avós e avoas do CAAN que si teñen atopado un novo fogar, como “Lora” e “Parada”, de 12 e 9 anos respectivamente, que levaban no centro desde abril e esta semana saíron cara a Pontevedra. Hai que lembrar tamén que o pasado 2020 saíron en adopción tamén animais que estiveran moito tempo nas instalacións, como Apro, que pasara seis anos; Coqui e Nikita, que estiveran catro, ou Marce, que pasou tres. Na actualidade, o que máis tempo leva é Posto, un cruce de pitbull de tres anos que leva desde o 2018 no centro, tras ser recollido en Redondela.

«Nós pretendemos ?indicou Carmela Silva- que os animais estean aquí o tempo imprescindible, que todas e todos teñan un fogar. Sentímonos moi satisfeitas e satisfeitos de que estes animais haxan conseguido un novo fogar e a xente que os adoptou ten moito mérito. Agora espero que en pouco tempo poidamos subir un chío dicindo que estes avós e avoas foron adoptados».

«A outra cara da moeda está nas recollidas», e aínda que a tendencia é descendente -ata o 23 de maio lévanse 426, 13 menos que o ano pasado neste mesmo período- seguen a producirse, lamentou, «situacións lamentables e teño que denuncialo porque hai que crear conciencia na sociedade», especialmente no que se refire ao abandono de cachorros. A presidenta citou por exemplo o caso dos Kira, Coco, Leo e Edy que foron arroxados esta mesma semana con tan só un día de idade a unha vía do tren en Silleda, que están a recuperarse e a ser aleitados por unha nai adoptiva, Santa, rescatada en Vilaboa, que amais destes catro está a alimentar tamén aos seus tres cachorros nados estes días.

Aínda así, como destacou, esa tendencia á baixa nótase nos datos dos últimos anos. En todo o 2020 houbo 1.144 recollidas, unha cifra que no 2019 fora de 1.332 e no 2018, de 1.788. E outro dos aspectos nos que incidiu foi o da redución do tempo de estancia dos animais que saen adoptados, que neste 2021 está a ser dunha media de 86,8 días fronte aos 123,8 días do 2020. «A conclusión ?engadiu- é máis adopcións, menos abandonos e redución do tempo de estancia. E fago de novo un chamamento: non abandonen animais, é unha mala praxe como xénero humano. E veñan ao CAAN e adopten. E temos un reto como provincia, temos que adoptar a estes cans e cadelas que son máis maiores ou levan moito tempo aquí. Aínda que teñan o mellor trato, están mellor nun fogar»..