Rematan as obras de urbanización na rúa Sevilla de Cambados tras tres meses de execución
CAMBADOS
Financiadas polo Plan de Concellos 2020, contaron cun presuposto de licitación de 154.00 euros
11 ago 2021 . Actualizado a las 05:00 h.A rúa Sevilla, unha das principais arterias situadas entre o conxunto histórico de Fefiñáns e o paseo marítimo de Cambados, volve a ser transitable tras o fin das obras de urbanización financiadas polo Plan de Concellos 2020, que contaron cun presuposto de licitación de 154.00 euros.
O que nun principio se solucionaría nun prazo de 44 días, foi executado nun período de tres meses debido a que as obras foron ampliadas. Inicialmente o proxecto centrábase na pavimentación, con fresado previo e unha nova sinalización, ademais de novos aparcamentos e beirarrúas, pero este viuse dilatado mediante unha reforma integral de todas as instalacións soterradas, o que fixo tamén duplicar o orzamento. «Había unha rede unitaria de saneamento e augas pluviais, e na liña do compromiso que vimos asumindo dende que estamos no goberno de facer redes separativas para evitar, por un lado, vertidos directos ao mar, e por outro, o colapso das redes de saneamento», engadiu o concelleiro.
«O certo é que esa rede era moi necesaria, moito máis que a propia urbanización e humanización da rúa, xa que houbo anos nos que varias vivendas se viron completamente anegadas con augas fecais», explica a alcaldesa do concello cambadés, Fátima Abal.
A obra contou con certas complicacións técnicas xa que «durante os gobernos anteriores, cada vez que se producía ese tema de inundacións, asfaltaban por riba e cada vez a rúa estaba máis alta», engadiu a alcaldesa, de tal xeito que o proxecto se tivo que adaptar á situación de cada unha das casas.