A trixésimo quinta edición comeza esta tarde, ás cinco, no pavillón de deportes do colexio de San Tomé
01 ago 2019 . Actualizado a las 05:00 h.O pavillón de deportes do colexio de San Tomé de Cambados é desde hoxe e ata o día 9 o local de xogo da trixésimo quinta edición do Open Internacional de Xadrez do Albariño. A cargo un ano máis do Club de Ajedrez Albariño, a súa gran bolsa de premios en metálico, de preto de 10.000 euros, atraeu o interese de 17 mestres federados, practicamente un de cada cinco dos 88 xogadores inscritos no campionato.
O Mestre Internacional arxentino Tomás Sosa encabeza o ránking de forza de saída, cun ELO FIDE de 2.516 puntos, seguido de tres Grandes Mestres, o romanés Marius Manolache, o cubano Elier Miranda e Arián González. As mestras internacionais cubanas Yerisbel Miranda e Yuleikys Fleites máis a Mestra FIDE española Inés Prado contan coas mellores cartas de presentación entre as xogadoras anotadas.
As partidas comezan esta tarde, ás cinco, horario que se manterá todos os días agás a novena e derradeira xornada, que arrincará o día 9 ás tres da tarde.