vilagarcía / la voz

A cuarta edición do Tríatlon Popular Concello de Cambados incorporou dous novos nomes ao seu historial de campións. Cos debutantes Diego Paz Sobreira (Arcade Inforhouse Santiago) e Penélope Martínez Justo (Tríatlon Arteixo) facéndose cos triunfos absolutos masculino e feminino ao termo da proba de distancia esprint (750 metros a nado, 19 quilómetros de ciclismo e 5 mais de carreira a pé).

A apertura do día ameazaba con endurecer a proba, pero o paso das horas deixou un escenario neutral, que dulcificou o primeiro treito, o de natación, ante a ausencia de vento. Os 17 graos na auga, e a decisión da maioría dos 172 triatletas que finalmente decidiron presentarse na liña de saída do illote de San Sadurniño -houbo 28 incomparecencias- de enfundarse o neopreno reduciron as diferenzas na auga.

Dela saíron en cabeza e á par os tres triatletas que acabarían repartíndose os postos do podio absoluto masculino cambadés. Diego Paz, o cadete David González Borges (C.T. Mar de Vigo) e o júnior Víctor Bouzón García (Olímpico de Vedra). O trío rodou xunto o segmento ciclista, pero na carreira a pé Diego Paz non tivo rival, cruzando a meta con tempo para recrearse na vitoria tras completar o trazado en 56 minutos e 38 segundos, 1.26 menos ca González (58.04) e 2.12 ca Bouzón (58.50).

En féminas foi a mesma historia, coa diferenza de que a cousa se limitou a dúas rivais. Penélope Martínez aproveitou o menor fondo físico dunha Aída Valiño que disputaba a súa primeira proba de tríatlon en anos, tras a súa retirada temporal por razóns de maternidade, informaban onte desde a organización da carreira cambadesa. Martínez coroouse nunha hora, 5 minutos e 5 segundos, 43 segundos menos que Valiño (1.05.48). Xa a 5.40 da gañadora completou o podio a cadete Antía Pazos (C.T. Mar de Vigo).

Grande seguimento

Miguel Fernández, director deportivo do Tríatlon Popular Concello de Cambados, manifestaba onte a súa satisfacción por comprobar como cada vez son máis os afeccionados e demais curiosos que se acercan ao paseo marítimo e, sobre todo, á zona de transición fixada cada ano no porto de San Tomé, para aproveitar as facilidades que o circuito urbano cambadés ofrece á hora de seguir unha proba tan plástica como un tríatlon.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Diego Paz e Penélope Martínez gañan o Tríatlon Popular de Cambados