«Somos conscientes de que non estivemos ben nestes dous últimos meses». Edu Charlín asume o peso dos resultados. Mesmo a parte que lle corresponda nos mesmos, en tanto «ás veces os adestradores tamén nos equivocamos». Tamén é consciente de que, tras unha primeira volta de matrícula de honra, «a xente pasou de comer ovos con chourizo a querer caviar». E a realidade, lembra, é que «somos un equipo recén ascendido, e hai que ser consecuente. Os equipos teñen baixóns, e mellor sufrilo con esta puntuación a non ter a que agarrarse».
Con isto o adestrador do Juventud Cambados quere poñer en valor o feito de que, a falta de doce xornadas para a conclusión do campionato, «o primeiro obxectivo do equipo, salvarse, está conseguido» tras chegar aos 47 puntos.
Sobre esta sólida base de metal precioso, e coa confianza de ter derrotado hai uns días o líder, Edu Charlín non renuncia a nada, como tampouco lle mete presión ao seu equipo. «A partir de agora tentaremos gañar o máximo número de partidos, tentar non perder a senda dos equipos de arriba. E se nos dá para estar entre os dous primeiros, ben», di.
Dar o salto de categoría pasaría polo éxito en dúas empresas. A curto prazo, gañar na Estrada o vindeiro mes. E de aquí a final de Liga, «mellorar os nosos números en Burgáns, e recuperar a nosa regularidade da primeira volta», subliña o seu adestrador, «para volver a enganchar o afeccionado». A el se dirixe cando conta que «inda quedan moitos partidos entre os equipos de arriba».