Cambados abre a inscrición para a quinta San Silvestre Solidaria

O Concello e o club local anuncian novamente premios á velocidade e tamén aos mellores disfraces na última tarde do ano


O Club Atletismo Cambados-Seguros Noval e o Concello da vila do albariño veñen de abrir a inscrición na que será a quinta edición da San Silvestre Solidaria Cambados. Unha carreira que se disputará o 31 de decembro, co inicio das súas saídas ás catro e media da tarde e cunha distancia para os atletas que participen na categoría sénior de 4 quilómetros.

A organización volve pedirlles aos atletas que acudan cun quilo de comida ou cun xoguete á hora de recoller o seu dorsal. Tamén recordan que a animación será recompensada, con premios aos tres mellores disfraces individuais adultos e aos tres infantís, e ao mellor disfrace de grupo, debendo neste apartado participar co mesmo motivo cando menos tres persoas. Nas dúas primeiras categorías haberá vales de compra de Zona Centro de 100, de 75 e de 50 euros para o primeiro, para o segundo e para o terceiro, e de 150 no caso do mellor disfrace colectivo.

O día 28, data límite

Nas categorías chupete, mini e promesas haberá medalla conmemorativa para todos os participantes, e trofeo para os tres primeiros en meta nos dous últimos grupos de idade. Na categoría absoluta o gañador da San Silvestre Solidaria Cambados 2018 levará un trofeo e mais unha cesta de Nadal, con trofeo e un lote de Nadal para os seus acompañantes nos outros dous chanzos do podio.

A todo o anterior o C. A. Cambados e o Concello suman como incentivo rosca gratis para os participantes e mais para o público, a fin de repetir o grande ambiente rexistrado na vila nas catro edicións anteriores da carreira. Os interesados teñen ata as 23.59 horas do xoves 28 para anotarse na San Silvestre, a través da páxina web galitiming.com.

A San Silvestre Solidaria Cambados contou o ano pasado na súa cuarta edición con medio milleiro de participantes, que entregaron más de 500 quilos de alimentos e de produtos de hixiene.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Cambados abre a inscrición para a quinta San Silvestre Solidaria