Dimensión, cor, linguaxe... Menchu Lamas

O cambadés Pazo Torrado acolle ata o 23 de setembro "Vieiros da cor", exposición dunha das artistas referenciais da pintura contemporánea en España


Pazo Torrado • Ata o 23 de setembro • Cambados • De marcado corte expresionista, enfrontarse á abrumadora obra de Menchu Lamas é un acto de expectante encontro entre a muralística beleza compositiva de forma e cor, e a sempre enigmática e perturbadora incógnita do significado dos seus símbolos. A elección do gran formato, a súa dimensión, convida o espectador a adentrarse no mesmo cadro, a inserirse e formar parte del. 

Como ben apunta Fernando Castro Flórez, o interese polo grande formato, segundo a propia artista, vén dado pola procura da sensación de estar dentro do cadro. Entre os abstractos fondos móvense repetidos símbolos e figuras na superficie pictórica; ás antropomórficas (man, figura humana) ou zoomórficas (peixe, paxaro, hipocampo) engádenselle figuras xeométricas (coma o círculo, o labirinto, a espiral).

O contraste de tonalidades entre os fondos de cromáticas diluídas e delicadas coa cor máis vigorosa e viva das figuras axudan a resaltar e pór nun primeiro plano a mensaxe, o motivo. Digamos o estribillo do cadro. Logo, o xesto da brocha impregnada humaniza a obra. E todo isto en favor da procura do equilibrio harmonioso da composición.

Percorrer as pequenas salas do Pazo Torrado cunha exposición pictórica de gran formato como a que se presenta nesta ocasión sempre é un risco. A dimensión dos cadros absorbe o espazo... Ás veces tamén o espectador. Pero o risco paga a pena.

Uns brochazos biográficos da creadora

Menchu Lamas (Vigo, 1954) é unha das artistas máis importantes e de obrigada referencia para a pintura contemporánea en España, e clave para entender a arte galega a partir do último cuarto do século XX. Compoñente importante de Atlántica 1, grupo que pon a Galicia no mapa artístico mundial, enlazando primeiro coas vangardas históricas e os chamados Novos Salvaxes (Die Neue Wilden 2), pero tamén desde a Expresión Atlántica, enlazando co mundo precristián, céltico e atlántico.

Menchu Lamas ingresará este ano na Real Academia de Belas Artes de Galicia xunto á escultora Soledad Penalta.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Dimensión, cor, linguaxe... Menchu Lamas