A Federación Española desestima o recurso do Xuven

Baloncesto O club cambadés queima o seu último cartucho no CSD


vilagarcía / la voz

A primeira hora da tarde de onte o Club Xuventude Baloncesto recibía a nova. A Federación Española de Baloncesto rexeita o recurso co que desde os despachos do Pombal lle requerían ao órgano reitor do deporte da canastra a admisión do primeiro plantel amarelo na vindeira edición da Liga EBA. Unha competición na que contaba con dereitos deportivos tras o descenso do conxunto cambadés desde a LEB Prata, pero da que foi excluído pola FEB por un defecto de forma, ao ter presentado fóra do prazo administrativo a sinatura dun dos catro directivos que respaldaron o aval requerido.

O certo é que a decisión non colleu por sorpresa a ninguén en Cambados. Tanto é así, que no momento de facer pública a súa intención de recurrir pola vía administrativa a exclusión da EBA, a directiva do Xuven adiantaba que acudiría de ser preciso perante o Consejo Superior de Deportes prevendo o non da Federación. O mesmo modo de operar ao empregado un ano atrás polo Marín PeixeGalego e polo Zornotza tras a súa exclusión da LEB Prata, e polo C.B. Chantada despois de verse fóra da EBA.

O Xuven informou da inminente presentación do recurso no rexistro do CSD. O problema é que o seu caso semella máis próximo ao do Marín e do Zornotza, có do Chantada. O CSD déralle o verán pasado a razón á FEB no tocante aos dous primeiros, castigados por cadanseu defecto de forma e de tempos na tramitación da súa inscrición federativa, fallando pola contra a prol do club lugués, que si presentara, e con tempo, todos os papeis a través da Federación Galega de Baloncesto; só que esta aparcáraos incomprensiblemente deixando morrer o prazo da Española sen darlles curso a Madrid.

¿Agardar ata o 1 de setembro?

A segunda derivada da baza do CSD son os prazos. E é que hai un ano Marín, Zornotza e Chantada non souberon da decisión final do CSD ata o 1 de setembro.

Noutra orde de cousas, onte o Marín anunciou a fichaxe de Juanchi Orellano para o seu proxecto de volta á LEB Prata. O base hispanoarxentino manténse así na categoría, logo de destaparse coma un dos mellores directores de xogo da última Liga no Xuven.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

A Federación Española desestima o recurso do Xuven