A Arribada Gaélica maridará tradición, música, festa e deporte

Unha travesía pola ría e unha foliada mañá darán paso o sábado a un torneo e a un concerto maratoniano

.

vilagarcía / la voz

O edil de Deportes de Cambados, Víctor Caamaño, e o directivo e xogador do Cambados Gaélico, Manu Oubiña, presentaron onte no consistorio da vila do albariño a segunda edición da Arribada Gaélica. Unha iniciativa do club local, con excelente acollida o ano pasado, que busca aunar a promoción da tradición do mar e da música galegas coa práctica do fútbol gaélico, todo envolto nun ambiente festivo e que contará con dúas xornadas de programa.

Mañá venres a Arribada Gaélica arrincará cunha travesía dunha ducia de embarcacións tradicionais pola ría de Arousa. Con saída ás catro da tarde desde o peirao de Tragove ata a illa da Rúa, e chegada prevista no punto de inicio sobre as sete. Os participantes desprazaránse acto seguido á Praza de Alfredo Brañas, onde haberá unha foliada de gaiteiros con churrascada.

A Arribada Gaélica continuará o sábado, no complexo polideportivo do Pombal, co Torneo de Fútbol Gaélico, de 10 a 14 horas. Aos tres equipos do Salnés, o Dorna F.G. da Illa de Arousa, o Mecos F.G. do Grove e o anfitrión, o Cambados Gaélico, súmase nesta segunda edición como convidado o Herdeiros de Dhais de Lalín. A final está programada para a unha da tarde, recuperando despois a Praza Alfredo Brañas como epicentro da Arribada Gaélica. Alí, desde as dúas e media, soarán dez horas e media de música ata a unha da madrugada do domingo. Con actuacións dos grupos Take It Easy (14.30 horas), Zeltia (16), Sparkle Queens (17.30), Treboada Rock (19), Crespo (20.30), Leda Atómica (21.30), Jaguars (23) e DJ Paints (00.30 horas). Con eles aqueles que se acerquen á Praza Alfredo Brañas poderán gozar de estilos tan diferentes como o rock, o folk, a música disco, ou o reggae.

Igual co día anterior, o Cambados Gaélico porá a disposición dos visitantes á Arribada Gaélica unha churrascada e unha barra, cos que pretende recadar fondos cos que encarar a vindeira tempada, a terceira da súa inda curta existencia.

 

Actividades para nenos

Pensando en facilitarlle a asistencia a todos os públicos, o Cambados Gaélico tamén ofrecerá o sábado, de 18 a 20 horas, un obradoiro de maquillaxe e de globoflexia infantil a cargo das Titiriteiras.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

A Arribada Gaélica maridará tradición, música, festa e deporte