Afeito a patronear, Salva ponse agora ao fronte dun barco con 500 socios e cun obxectivo claro: «Engraxar a maquinaria»
09 mar 2015 . Actualizado a las 21:01 h.A Asociación Cultural e Deportiva Dorna da Illa de Arousa, unha das máis activas e representativas da bisbarra, estrea directiva. O equipo de nove persoas que preside Salvador Allo foi elixido por aclamación nunha asemblea celebrada o sábado para que manteña o rumbo deste barco durante catro anos.
-¿Cal é o seu principal obxectivo nesta etapa?
-O máis importante é conservar o número de socios. Cos tempos que corren a xente mírase moito á hora de pagar os dous euros ao mes de cuota.
-¿Hai quen deixa a asociación por 24 euros ao ano?
-Si. Hai moitas baixas naquelas cuotas que vencen en xaneiro e febreiro. Por iso pensamos polas ao cobro en dúas datas estratéxicas: en xuño e decembro. As baixas son, sobre todo, de parados e emigrados, e logo da xente que está pasándoo mal coa crise. Vinte e catro euros ao ano non é nada, aínda que lle teñas que pór a maiores 10 euros para as clases de música ou cinco euros para a vela, pero á hora de recortar, a xente vai a estas cousas. Non é que queiramos ter unha chea de cartos. A nós, con ter para gastos, chéganos. E nisto axúdanos moito o Concello, que sempre está para botar unha man.
-Fáleme dos seus proxectos.
-Sobre todo darnos a coñecer, facerse ver máis. Que a xente se dea conta de que isto funciona porque hai unha directiva detrás. O máis difícil está feito; a maquinaria está a andar e agora nós temos que engraxala.
-¿E como van facelo?
-Con máis carteis, anunciando todas as actividades... Dás por feito que todo o mundo sabe o que facemos, pero non é así.
-¿Que actividades oferta Dorna actualmente?
-Temos en marcha as actividades de todo o ano: o baloncesto, a música, o baile tradicional e o xadrez. Estamos arrancando co fútbol gaélico, xa hai equipo e estamos cos preparativos para federalo. E logo temos as dornas, preparándoo todo para navegar o 17 de maio.
-¿A escola de navegación tradicional volve no verán?
-Si, despois do 17 de maio imos para O Bao e a mediados de xuño estamos operativos.
-Sen o prometido centro náutico...
-Estamos pendentes da Deputación e do Concello, despois de que se retirara a empresa que gañou o concurso do proxecto. Sabemos que están presupostados medio millón de euros e penso que a obra pode ir adiante. Levamos reivindicando estas instalacións máis de vinte anos, nós e o piragüismo. Hai asociacións que teñen unhas condicións moito mellores para gardar os barcos no inverno, cando nós temos 50 embarcacións e 80 persoas asociadas á vela. Sen tempo non era.
-¿Que representa para vostede estar ao fronte desta Dorna con maiúsculas?
-É unha honra moi grande e unha responsabilidade enorme, e quero agradecer a confianza que puxeron en min os socios. Estamos aquí porque non había xente que a collera, para que non desaparecera, e agora hai que mirar de non facelo mal. Supoño que haberá cousas boas e malas.
-¿Desaparecer?, iso sería un golpe duro na Arousa.
-Sería penoso. Hai catro anos non aparecera ninguén para meterse na directiva e mobilizáronse os pioneiros, de 70 anos, para dicir que había que moverse.
-Dorna é unha asociación con historia, ¿mudou moito?
-Ou te adaptas ou morres. A principal diferenza quizais sexa a mobilización social. Antes había un chamamento e a xente volcábase, agora non. Debe ser a televisión o que se está moi cómodo no sofá. Hai que mirar de sacar á xente do sofá e que se poña en marcha en cousas colectivas; que a xente fale máis entre ela, cara a cara e sentindo a pel, non todo vai ser por Internet.
Salvador Allo García presidente da asociación Dorna da Illa
«Levamos 20 anos reivindicando o centro náutico. Penso que obra pode ir adiante»