A Festa da Anguía conxugará gastronomía e verbena con París de Noia e Marbella

Valga xa conta os días para a celebración da trixésimo sexta edición da Festa da Anguía e Mostra da Caña do País, unha cita declarada de Interese Turístico de Galicia que despregará durante todo agosto unha ampla axenda cultural, lúdica e gastronómica dirixida tanto a veciños coma a visitantes.

A xornada central da festa terá lugar o sábado 29 de agosto no parque Irmáns Dios Mosquera e concentrará os actos máis multitudinarios. A pregoeira desta edición será Antía Piñeiro, mestra titora da escola de Vilarello e candidata a mellor profesora de España. Durante esta xornada, os asistentes poderán degustar un total de 1.000 tapas de anguía preparadas en cinco receitas diferentes: catro elaboradas polo cociñeiro Álex Iglesias e unha quinta a cargo do bar O Pontellón, gañador da última ruta coa súa creación Bombón Pontellón, unha croqueta de anguía rebozada en pasta kataife sobre chutney de mazá. No apartado da augardente, serviranse ata catro variedades de cócteles e o Centro de Interpretación acollerá a demostración de destilado tradicional con dúas potadas a cargo de dous cañeiros locais. O día completarase coas entregas de premios dos concursos de caña, cartel anunciador, Embelecer Valga e mellores tapas.

A gastronomía local terá tamén un enorme protagonismo coa décimo terceira Ruta-Concurso Tapa a Anguía, que se celebrará nas dúas últimas fins de semana de agosto, os días 22, 23, 29 e 30, coa participación récord de trece establecementos hostaleiros. O programa culinario complétase con obradoiros e demostracións como o concurso Anguía Chef, o showcooking Universo Anguía e as catas tradicionais do caña de país.

A oferta musical e de lecer inclúe o concerto homenaxe a Andrés Dobarro a cargo de Carolina Rubirosa e Xavier Alcalá, o venres 21 de agosto, a actuación da Banda Municipal de Valga e a gran verbena do sábado 29, que estará animada polas orquestras París de Noia e Marbella.

---

---

---