Adeus de Blanca Manivesa e de Gara Jorge a un Cortegada que renova a Marta Sanmartín
AROUSA
Os primeiros movementos no cadro de xogadoras apuntan a un cambio profundo na configuración do Mariscos Antón
19 jun 2026 . Actualizado a las 05:00 h.Tras anunciar o pasado venres a continuidade da capitana Cris Loureiro, a directiva da Agrupación Deportiva Cortegada comunicou este xoves unha segunda renovación e dúas baixas no vestiario do Mariscos Antón para a vindeira tempada na Liga Femenina 2. A primeira, a da base Marta Sanmartín, e Blanca Manivesa e Gara Jorge no caso das saídas do club.
Sanmartín cubrirá a súa cuarta campaña nas filas do primeiro equipo da AD Cortegada, logo de confirmar a pasada Liga un novo paso adiante na súa evolución cara a unha directora de xogo quen de aunar capacidade de liderado e de xestión en pista do quinteto vilagarcián.
Calidades estas últimas que veu demostrando Blanca Manivesa nos últimos catro cursos, converténdose nun dos referentes do cadro arousán tras chegar a Vilagarcía con 25 anos procedente do Rosalía. A aleiro canaria Gara Jorge deixa polo seu lado un gran pouso logo de dous anos no Mariscos Antón.
As saídas de Manivesa e de Jorge apuntan a un cambio fondo no proxecto deportivo co que o Cortegada tentará encadear na LF2 2026/27 a terceira participación na fase de ascenso á Liga Challenge.