Os cadetes do CR Mecos suman o título nacional de traiñeiriñas ao de bateis
AROUSA
Tempada inmellorable a que veñen de pechar os integrantes da tripulación cadete masculina do Club de Remo Mecos. Campións de España de Bateis a terceira semana de abril na localidade éuscara de Legutio, os deportistas do Grove trouxeron o pasado domingo de Castro Urdiales, Cantabria, a bandeira que os acredita como o mellor barco da súa categoría no Campionato de España de Traiñeiriñas, a categoría intermedia do remo de banco fixo.
Sete minutos, 3 segundos e 89 centésimas déronlle o título ao C.R. Mecos na final da mañá do domingo. Un tempo 2 segundos e 69 centésimas inferior ao empregado pola embarcacións do C.R. A Cabana-Ferrol, que xunto ao C.R. Actividades Náuticas, a 8,12 segundos da traiñeiriña arousá, completou o podio cadete.
Cinco dos sete integrantes do barco grovense despiden a tempada 2026 como bicampións de España. Marcos Cores Soto, Mateo González da Silva, José Carlos Caneda Gómez, Breogán Villanueva Conde e o patrón Eidan Carei Poza Diorno comparten en cadanseu palmarés as medallas de campións nacionais de bateis e de traiñeiriñas 2026. En Castro Urdiales, con Javier Egea González e con Aitor Míguez Alonso completando a media ducia de prazas na bancada meca.
Outras tres tripulacións do Grove competiron esta pasada fin de semana na cita de clausura da tempada de traiñeiriñas, en Castro Urdiales, ningunha delas clasificada para a regata polos títulos. A embarcación absoluta masculina do C.R. Mecos gañou na matinal do domingo a final B, cos compañeiros da categoría xuvenil masculina finalizando terceiros na final de consolación. Pola súa banda, as séniores do Amegrove C.R., campioas de España de bateis en abril, tiveron que conformarse desta volta co triunfo na final B.