O Breogán dá o primeiro paso para crear unha sección federada de vela no Grove
AROUSA
Representantes do club meco reuníronse con técnicos da Real Federación Galega de Vela
23 may 2026 . Actualizado a las 05:00 h.O presidente do CMDC Breogán, Félix Lamas, o director técnico do club, José Luis Otero, e Miguel Otero reuníronse onte no Grove co director técnico e coa coordinadora de actividades da Real Federación Galega de Vela, Bruno Gago e Loli Camba. O obxecto da xuntanza foi abrir unha vía de colaboración entre ambas as dúas entidades, en liña coa intención do Breogán de botar a andar unha sección de vela federada, baixo coordinación de Miguel Otero.
Con tal fin, o Breogán informou a RFGV da súa pretensión de organizar este verán unha serie de cursiños de iniciación á vela. Unha iniciativa moi ben acollida polos representantes da Federación. Tal é así, que desde esta última amosáronse abertos a prestarlle ao Breogán o material preciso para dar os primeiros pasos de cara a constitución da futurible nova sección deportiva da entidade meca, xunto con persoal titulado. Ambas as dúas partes emprazáronse a próximos contactos para perfilar os detalles da colaboración.