A baixa de Nicole e a perda de Sineiro lastraron o cadro meañés na Cañiza
13 ene 2026 . Actualizado a las 05:00 h.O Inelsa Solar Asmubal Meaño completou o pasado sábado a primeira volta da Liga de División Honor Plata Femenina de balonmán encaixando a súa sexta derrota da tempada. O colíder, o Saeplast Cañiza, puxo punto final á brillante xeira de cinco vitorias coa que o equipo que dirixe Juan Manuel Costas despedira o 2025.
O conxunto sureño espremeu o factor cancha, posiblemente a máis complicada para os cadros visitantes na Liga polo apoio da afección local, superando 24-20 o Asmubal Meaño. Ademais do efecto ambiente, o cadro do Salnés pagou a súa inconsistencia en ataque, resentido pola baixa de Nicole, pendente de trámites burocráticos que a reteñen no seu país, Brasil, tras o parón do Nadal, e de Raquel Sineiro, retirada da cancha nos primeiros minutos da segunda metade tras sufrir un golpe nun pé cunha rival. Agás Laura Miniño, con 7 goles, o Asmubal careceu dun referente goleador que axudase a acadar ese punto ofensivo que permitese igualar a un Cañiza practicamente todo o partido por diante no marcador.
O adestrador do Inelsa Solar, Juan Manuel Costas, lamentou a relaxación das súas xogadoras durante o parón competitivo nas semanas do Nadal, factor que, estima, resultou clave á hora de enfrontarse ao colíder na súa casa no primeiro partido do novo ano.
Finalizada a primeira volta, e tras un arrinque do máis preocupante, coa primeira vitoria facéndose esperar ata a xornada seis, á que chegara cun só punto, Costas lembra que o Asmubal perdeu moitas xogadoras importantes o pasado verán sen recambios de similar nivel. Sétimo de catorce equipos con 13 puntos, 7 sobre o descenso, o técnico valora principalmente «o moito que están sumando as xogadoras máis novas».