Tres vitorias nas últimas catro xornadas de Liga permitíronlle ao Inelsa Solar Asmubal Meaño saír do pozo da clasificación do Grupo A da División Honor Plata Femenina de balonmán e escalar á zona media da táboa. Oitavo con 7 puntos en nove partidos, o conxunto que dirixe Juan Manuel Costas parte hoxe (20 horas) como claro favorito no seu duelo no Coirón-Dena fronte ao pechacancelas, o Balonmano Perdoma.
Un só punto loce o conxunto tinerfeño no seu casilleiro, que reflicte os números do peor ataque e da peor defensa do campionato. O feito de que ese punto o sumase a anterior fin de semana, e que o fixera a costa do Balonmano Gijón, subcampión da fase regular a tempada pasada e, como o Asmubal Meaño, con dificultades para comezar a carburar na presente, pon en alerta ao técnico do conxunto do Salnés.
Neste punto, Costas subliñaba onte a necesidade de que as súas xogadoras —hoxe conta con todas agás Cárol Ferreira— «saian con intensidade» para non atoparse cunha sorpresa.