Abalo ofrecerálle a continuidade a Luisito tras unha temporada «impresionante»
AROUSA
Os socios do club votarán novo presidente o mes que vén
23 may 2023 . Actualizado a las 05:00 h.«Impresionante». Con esta palabra definía no día de onte o presidente do Arousa, Manolo Abalo, a temporada feita polo primeiro equipo arlequinado. Unha campaña á que non lle tería feito xustiza o fútbol coa súa eliminación, o pasado sábado sobre o céspede da Lomba, na segunda e penúltima rolda da promoción á Segunda R.F.E.F. E iso tan só, opina o mandatario do club, porque: «Non tivemos a sorte necesaria para devolverlle á afección todo o que nos deu. Se non fomos o equipo con máis mala sorte do campionato, estivemos entre os primeiros».
Abalo defende o seu criterio tirando dun dato: «Non sei se algunha outra temporada o Arousa chegou sen perder na Lomba ata o último partido» como fixo este curso, no que tan só o Racing Vilalbés foi quen de dobregar o cadro arlequinado, no choque de volta da súa eliminatoria.
«Quedo moi tocado, sobre todo por como medramos a nivel de sociedade», di o presidente ante o milleiro de afeccionados apoiando o equipo cada xornada na casa como chan da asistencia ás gradas da Lomba. «Tentouse con todas as forzas, pero non puido ser», conclúe Abalo.
Construír o novo equipo desde xa
Tras outros catro anos á fronte da entidade, Manolo Abalo debe someterse en breve ao escrutinio dos socios. O mandatario non podía ofrecer onte inda unha data exacta para a celebración das eleccións á presidencia, pero si sinalar: «A idea que temos é que estean feitas o 30 de xuño como máximo. Se pode ser antes, antes. Canto máis pronto, mellor».
Con todo, Manolo Abalo defende que o club non pode agardar ata a resolución electoral e debe comezar xa a construír o novo proxecto deportivo «non para ir a pola promoción, senón a polo primeiro posto» que dá o ascenso directo. Así as cousas, a actual directiva arlequinada reuniráse hoxe ou mañá porque, di o seu máximo responsable: «Hai que tomar decisións, sobre todo, porque imos retrasados respecto a outros equipos». O primeiro paso, a elección do adestrador, teno perfectamente claro Abalo: «Nós confiamos en que Luis —Míguez— diga que si e continúe connosco. É a mellor persoa para dirixir o Arousa. Despois de montar un equipo de novo o verán pasado, xa sabe o que ten na casa e o que precisa para melloralo».