David Iglesias, «Risi», conquista a súa sexta Liga ACT e o seu terceiro dobrete
AROUSA
O remeiro meco competiu este ano con Bermeo en todas as regatas
20 sep 2022 . Actualizado a las 05:00 h.Con 3 puntos de vantaxe chegaba a traíña de Bermeo Urdaibai ás dúas bandeiras puntuables da derradeira fin de semana de competición da Eusko Label Liga (ACT), sabendo que podía fallar o mínimo ante o empurre da tripulación de Matrix Hondarribia. De feito, esta última levou ao límite a contenda polo cetro de mellor barco do banco fixo de España ao vencer, o pasado sábado, o líder provisional na súa propia casa, ondeando a Bermeo Hiriko XL Ikurriña. Pero o domingo, na Bandeira El Corte Inglés, Urdaibai tirou de oficio para facerse co título nunha regata en formato contrarreloxio. E nas dúas regatas, como en todas as que remou Bermeo esta temporada, alí estivo o grovense David Iglesias, Risi, no dous de estribor (contramarca).
O remeiro meco conquistou así o que é o seu sexto título na Eusko Label Liga, gañando todos os disputados desde o 2016 agás o da edición do 2019. Os tres primeiros anos, na traiñeira de Bermeo, e no 2020 e no 2021, na bancada de Santurtzi. Risi, que só unha semana antes se facía co seu quinto título na Bandeira da Concha, consegue deste xeito o seu terceiro dobrete, tras os do 2016 e do 2021.