Un ano máis, e xa van oito consecutivos, Diego Romero Fraga foi o dominador do C1 Home Sénior
02 mar 2022 . Actualizado a las 00:28 h.Ausentes como é habitual os grandes nomes do piragüismo de pista nunha proba de medio fondo como é o Campionato Galego de Inverno, a cita sobre 5.000 metros disputada o pasado sábado no encoro ourensán de Castrelo de Miño viu a coroación de media ducia de padexeiros arousáns.
Un ano máis, e xa van oito consecutivos, Diego Romero Fraga foi o dominador do C1 Home Sénior. Como é habitual, co seu compañeiro do Breogán do Grove Tono Campos escoltándoo no segundo chanzo do podio, que desta volta completou o catoirense das Torres-Romaría Vikinga Fernando Busto.
Tamén na categoría sénior, a compañeira de Romero e de Campos tanto de club como na selección española de maratón Tania Álvarez proclamouse campioa galega de inverno no K1 Muller.
A paridade de xénero e de categoría marcou a relación de títulos arousáns en Castrelo de Miño. Así, na categoría Sub 23 os padexeiros do Náutico O Muíño de Ribadumia Manuel Fontán e María Pérez fixéronse co ouro no C1 masculino e feminino. E no mesmo barco, pero na categoría xuvenil, o vilagarcián das Torres-Romaría Vikinga Pedro Torrado e a grovense do Piragüismo Poio Valeria Oliveira con cadanseu título.
O dominio arousán da canoa no Campionato Galego de Inverno foi case absoluto. Tan só se resistiu o C1 Muller Sénior, que se levou a deportista do Escola Piragüismo Ciudad de Pontevedra María de la Peña.