O Torneo EncestaRías esgota os seus 200 abonos en 24 horas e confía en que a evolución da pandemia lle permita sacar outros 100 á venda

O regreso do baloncesto ACB a Vilagarcía non pasou desapercibido para os afeccionados. A organización do Torneo EncestaRías vén de comunicar que tan só precisou de 24 horas para ver voar os 200 abonos para a súa sexta edición que o pasado día 13 puxera á venda. A intención dos responsables do cuadrangular é poder satisfacer parte desa evidente gran demanda, confiando en que antes de rematar o presente mes as autoridades sanitarias de Galicia permitan ampliar o aforo máximo do Pavillón Municipal de Fontecarmoa. Neste sentido, desde a Asociación Deportiva e Cultural EncestaRías queren crer na posibilidade de poder poñer á venda outros 100 abonos para os catro partidos dun torneo que contará, o 10 e o 12 de setembro, co Joventut de Badalona, co Unicaja de Málaga e cos dous equipos galegos na ACB, o Monbus Obradoiro e o Río Breogán.

---

---

---