O Vilagarcía T.M. deberá defender a categoría en Burgos
15 may 2021 . Actualizado a las 05:00 h.A derradeira concentración do Grupo 1 da División de Honor, sistema empregado pola Real Federación Española de Tenis de Mesa esta tempada por razóns de seguridade fronte ao covid-19, rematou a pasada fin de semana no pavillón arousán do colexio San Tomé co Cambados T.M. subcampión da fase regular cos mesmos 11 puntos co Milagrosa e co Vilagarcía T.M. quinto e pechacancelas con só 5 dos 16 puntos posibles no seu casilleiro.
Así as cousas, o Cambados T.M. disputará os vindeiros días 22 e 23 a concentración para a clasificación para a fase de ascenso á Superdivisión. Concentración que tiñan dereito a organizar os dous campións dos grupos que agora se entrecruzan, o Milagrosa e o Leka Enea de Irún, e que foi para o cadro de Lugo polo curioso sistema de elección decidido pola Federación. Esta acordou que se o reintegro do sorteo da ONCE do pasado martes remataba nun número par o evento fose para Irún e que se o facía en impar rematase en terras galegas, como así foi.
En Lugo, o Cambados T.M. terá asegurado o billete para a fase de ascenso á Superdivisión, o 12 e 13 de xuño en Atenquera (Málaga), se derrota o Torrelavega, terceiro clasificado do Grupo 2, xa que o Leka Enea, que agardará como o Milagrosa nas semifinais, non poderá ocupar un dos tres postos en xogo por tratarse dun filial dun equipo na máxima categoría do tenis de mesa español.
Pola súa banda, o Vilagarcía T.M. deberá defender a súa praza na División de Honor en partido único e cancha rival. O día 22, fronte ao cuarto clasificado do Grupo 2, un Universidad Burgos TPF liderado polo xogador de Superdivisión Chicho Ausín.