Ás de Juan Costas só lles vale gañar na cancha do Carballal
17 abr 2021 . Actualizado a las 05:00 h.Repetir por segunda tempada consecutiva coma unha das franquicias da División Honor Plata Femenina do balonmán español e non experimentar outro paso fugaz pola categoría, como na estrea de catro anos atrás, obrígalle esta tarde ao Asmubal Meaño a conquistar a vitoria na súa visita á A.D. Carballal de Vigo (19 horas). Dous equipos separados por tan só 4 puntos antes do inicio da penúltima xornada da Liga. O cadro do Salnés é consciente de que, sendo o Rodríguez CLEBA, segundo clasificado do campionato, o seu último rival, hoxe se atopa ante a derradeira posibilidade realista de engordar o seu balance de puntos e aspirar a evitar o descenso como un dos dous mellores antepenúltimos dos catro grupos cos que conta a División Honor Plata Femenina.
Co HBC'74 de Camargo xa 3 puntos por enriba, e co mencionado encontro co CLEBA na axenda, ao conxunto que dirixe Juan Costas non lle queda outra que dar o mellor de si e mellorar a súa actuación na primeira volta. Daquela, no Municipal de Coirón, o Asmubal caía pola mínima 25-26, logo de ir a remolque o groso do partido e poñendo en apuros o Carballal ata o final.
Os dous equipos chegan a este momento con traxectorias paralelas no treito final do campionato. O cadro local, logo de perder catro dos seus últimos cinco partidos; certo é, os tres primeiros ante os tres mellores conxuntos do Grupo A da D.H. Plata Femenina. Con todo, o tropezo a semana pasada 29-26 na cancha do Lavadores, penúltimo clasificado, nun duelo con alta carga emocional pola gran cantidade de xogadoras do Carballal formadas no cadro rival, debe alimentar a crenza das balonmanistas do Asmubal nas súas opcións.
O gran problema de partida para o colectivo saliniense é o estado de Laura Miniño. A lateral dereita, referente goleadora do equipo, arrastra unha tendinite rotuliana nun dos seus xeonllos. Ademais, Lara Castro perdeu unha unlla esta semana e a súa participación no encontro corría onte perigo.
Juan Costas agarda a un Carballal cun muro 6-0, sabedor o seu rival da falta de lanzamento exterior do Asmubal, agravado pola situación física de Laura Miniño. A nivel ofensivo, a central viguesa María Pereira, cos seus case 6 goles por partido nados do seu xogo de fintas e penetración, parte como o maior foco de atención da defensa meañesa.