O C.D. Ribadumia volveu ao traballo coa dificultade de xestionar o post confinamento
AROUSA
Un dos futbolistas dera positivo en covid-19 hai dúas semanas
05 feb 2021 . Actualizado a las 05:00 h.O luns. Ese foi o día no que volveu ao traballo o groso do cadro de xogadores do C.D. Ribadumia tras rematar o confinamento domiciliario decretado polas autoridades sanitarias logo de detectarse o positivo en covid-19 dun dos futbolistas do equipo hai dúas semanas. Ese tempo, catorce días, é o que se cumpriu este martes desde o último adestramento do cadro aurinegro antes de ter que parar por dita causa de forza maior. Só catro xogadores, os dous positivos -un deles era un caso anterior sen contacto comprometido cos seus compañeiros- e outros dous pendentes dunha segunda PCR -todos os demais deron negativo nela-, reincorporaránse ás sesións de traballo na Senra previsiblemente nos vindeiros días.
O adestrador do C.D. Ribadumia, Luis Carro, que como o resto dos integrantes do seu corpo técnico evitou o confinamento por traballar sempre con máscara, declaraba onte ante a pregunta de como atopou os seus xogadores que «é complicado volver despois dun parón, e máis por unha causa así».
Nesta liña, o preparador vilanovés sitúa a parcela física nun segundo plano, máis sendo que este domingo o rival de Liga, o Alondras, chega nas mesmas circunstancias. Para Carro «o máis complicado é xestionar o aspecto anímico cos xogadores. Veñen de dez días pechados nas súas casas, con compañeiros positivos... É un tema -o covid-19- que está na cabeza de todos, e non é fácil de xestionar».