Mostra de carácter de Veloso na véspera da gran guerra pola Volta

O vilagarcián disputou o esprint polo triunfo na primeira etapa en liña, con final en Viana, entrando terceiro en meta


Tocáballe onte a Gustavo César Veloso comezar a defender o xersei de líder da Volta a Portugal tras gañar, por vez primeira, a prólogo contra o crono co que tradicionalmente arrinca a rolda lusa. E o vilagarcián cumpríu, ata o punto de pelexar o triunfo da primeira etapa en liña da Grandíssima. Nun esprint final no alto de Viana do Castelo, que rematou terceiro tras o vencedor Luis Gomes (Kelly-Simoldes) e o seu compañeiro no W52-F.C. Porto Daniel Mestre, que escalou do terceiro ao segundo posto da xeral tras rematar o domingo en Fafe a 1 segundo de Veloso e xusto por detrás dun Rafael Reis (Feirense) que onte cedía 10 segundos na chegada.

A etapa, a máis longa da edición especial polo covid-19 da Volta a Portugal, 180 quilómetros, estivo marcada pola fuxida do home do LA Aluminios Marvin Scheulen, que foi cabeza de carreira desde o quilómetro 4 ata o 167, a 13 de meta. Foi aí onde o traballo do W52-F.C. Porto, activado desde o 43 de carreira cando Scheulen superou os oito minutos de vantaxe, e o do Rally Cycling estadounidense a 17 do alto de Viana do Castelo deu froitos, lanzando a chegada masiva.

Tras un par de escaramuzas de homes secundarios na pelexa pola xeral foi Antonio Carvalho, ata o ano pasado un dos gregarios de luxo do W52-F.C. Porto e hoxe lugartenente de Jóni Brandão no Efapel, a grande alternativa á tiranía porteña, quen probou a uns 600 metros da meta. No final dos 4 quilómetros de subida empedrada cun 5 % de pendente que se lle fixeron demasiado longos. Veloso, que se colocou na cabeza do pelotón a 2 quilómetros da chegada, ofreceu unha mostra de carácter apretando para ver ata onde chegaban el e os seus rivais.

 

Caída de Ángel Sánchez

A cruz da xornada foi para o cambadés do Miranda-Mortágua. Ángel Sánchez resultou un dos catro damnificados nunha caída na parte traseira do pelotón a 16 quilómetros da chegada. Conseguíu proseguir a carreira, pero co pelotón xa lanzado, acabou entrando no último lugar do día, cedendo 11 minutos e 3 segundos, pasando a ocupar o último posto da clasificación xeral de 98 unidades.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Mostra de carácter de Veloso na véspera da gran guerra pola Volta