Portos de Galicia autoriza o uso do Cantiño para as festas gastronómicas dos clubs da Illa

As entidades deportivas e o Concello tiveron onte unha primeira reunión para fixar o protocolo hixiénico-sanitario que permita a súa celebración


vilagarcía / la voz

O luns os catro maiores clubs da Illa de Arousa recibían a grata noticia a través do Concello: Portos de Galicia viña de autorizar a instalación no paseo do Cantiño das carpas para as festas gastronómicas que cada ano abastecen o 50 % dos orzamentos do Céltiga, do Piragüismo Illa, do C.B. Dorna e do Club Ximnasia Rítmica Arousa. Obtido o permiso de ocupación do espazo portuario, as catro entidades deportivas e mais o goberno local mantiñan na tarde de onte unha primeira xuntanza de traballo á que deberían de seguir varias máis nos vindeiros días, de cara a fixar un protocolo hixiénico-sanitario común que lle permita ao Concello da Illa de Arousa conceder a necesaria autorización municipal ás celebracións gastronómicas.

Espazo 100 % seguro

«Temos que preparar un protocolo que teremos que seguir todos os clubs para respectar as esixencias fixadas pola lei, e máis, con medidas extraordinarias. Un protocolo que nos permita certificar ao 100 % que as nosas festas son un espazo seguro, que a xente veña tranquila sabendo que alí non se vai contaxiar». Deste xeito resumía horas antes da primeira xuntanza de traballo Álex Zels, voceiro do Céltiga e coordinador das súas festas gastronómicas desde hai 12 anos, o camiño que inda lles resta por facer aos clubs e mais o goberno local da Arousa para tirar adiante cun programa que debería arrincar coa Festa da Navalla, do 24 ao 26 de xullo, a cargo do C.B. Dorna, para continuar coa Festa do Mexillón, o 31 de xullo e o 1 e 2 de agosto, organizada polo C.X.R. Arousa, coas Festas Gastronómicas de Produtos do Mar do Céltiga repartidas entre o 6 e 9, 13 e 16 e 21 e 23 de agosto precedendo as dúas citas culinarias este ano en mans do Piragüismo Illa, a Festa da Ameixa Roxa, do 28 ao 30 de agosto, e a do Polbo, do 4 ao 6 de setembro.

Zels salienta a obriga de mudar a maneira de enfocar a loxística das festas organizadas polos clubs: «Haberá que fixar control de accesos -que non existía ata agora-, que non haxa aglomeracións para mercar os tickets nin para coller as mesas, sinalización de distancias sociais, que facemos cos baños... Son moitas cousas que hai que planificar. E temos que poñernos todos de acordo».

Un terzo menos de aforo

Entre os temas capitais, desde o Céltiga asumen que toca reducir sensiblemente o aforo das festas: «Se tiñamos 900 persoas sentadas, calculamos que tocará deixalas en 600». Porque máis aló das marxes da regulación legal, «queremos que a xente se sinta segura».

«A un mes vista para nós é moi pouco tempo para organizar unha festa, pero moito para que o coronavirus se meta polo medio», di Zels. Con todo, confía en que todo sairá ben. Ata o punto de poñer o luns en marcha a loxística das Festas dos Produtos do Mar.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Portos de Galicia autoriza o uso do Cantiño para as festas gastronómicas dos clubs da Illa