«Come a Comarca» saborea a cociña do mar de Arousa

A TVG emite o martes o programa gravado no Salnés con Javier Olleros como guía


vilagarcía / la vozData / agencia

A sétima entrega de Come a Comarca, o concurso gastronómico que cada martes emite a TVG, ten sabor a mar. O equipo que conduce Fran Cañotas chega a terras do Salnés para coñecer os segredos dunha cociña que se nutre da ría de Arousa e as hortas das terras que baña. Cinco cociñeiros afeccionados viaxan á bisbarra para aprender a elaborar varios dos seus pratos típicos e medirse con algúns dos mellores restauradores que prenden aquí os seus fogóns.

Desta volta, é Javier Olleros, chef de Culler de Pau e posuidor dunha estrela michelin, quen exerce como sherpa culinario dos cinco participantes. O restaurador meco guiaraos nunha singradura pola cociña arousá que ten a súa primeira parada precisamente no Grove. Por algo aló abre Olleros as portas do seu prestixioso restaurante. Como tamén o fan Joaquín Álvarez e Tomás Bea, de Sal de Allo, dous dos cociñeiros profesionais que integran o equipo de Come a Comarca en representación do Salnés. Non se esgota aquí o papel meco no programa, xa que o patrón maior da confraría, Antonio Otero, é o mestre que explicará dende a lonxa como se captura un dos produtos estrelas da ría, que mañá terá moito que dicir e máis aínda que saborear: o centolo. Loli Quintero, da Lareira do Larexo, coñece ben as súas propiedades gastronómicas e como respectalas ao preparalo.

Aclarado por onde comezará o menú, a comitiva trasladarase á Illa de Arousa para comprobar en persoa o xeito de elaborar unha boa caldeirada de peixe da man dunha verdadeira experta: Carme Outeada, responsable da cociña do restaurante A Meca. Como non hai dous sen tres, a experiencia non pode rematar sen unha sobremesa axeitada. Nada mellor que unhas filloas para deixar un bo sabor no padal. E mellor aínda se quen amosan á súa arte na materia son as gañadoras do concurso de filloas de Cambados do ano pasado na súa modalidade contrarreloxo: María e Victoria Blanco.

Estas son, pois, as tres receitas do menú que mañá, ás 22.30 horas, propón a TVG: salpicón de centolo, caldeirada de peixe e marisco, e filloas acompañadas de crema de queixo e uvas. O acto final consiste na súa preparación, na praza de Fefiñáns, nunha sesión na que o equipo se enfrontará á xente de Sal de Allo, a Maite Otero e Aránzazu Fernández, da Fonte do Viño de Cambados, e a Marta Esperón, do restaurante Carmen de Sanxenxo. Quince veciños da comarca serán quen decidan cal deles come verdadeiramente O Salnés.

«Estou feliz porque vin un programa con músculo, que nos permitiu falar de cociña», sinala Javier Olleros. O chef confesa que o concurso, producido por Voz Audiovisual, fixo que o pasase moi ben: «Para min, dende logo, é unha honra que contasen comigo nun programa tan ben preparado polos seus profesionais, cun presentador fresco e auténtico como Cañotas e uns concursantes marabillosos. Vai facer que a xente estea diante do televisor».

Texto

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«Come a Comarca» saborea a cociña do mar de Arousa