Vilanova, escola de oficios para toda Galicia, tamén en fin de semana

AROUSA

MARTINA MISER

Sesenta persoas coincidiron en Vista Real para aprender a manexar drons, carretillas e barcos

26 ene 2020 . Actualizado a las 05:00 h.

Cando o Concello de Vilanova mercou o pazo de Vista Real, alá polo ano 2010, poucos imaxinaban que este enclave privilexiado ía acabar converténdose nun lugar de estudo e formación, nun centro no que tan pronto se pode aprender a manexar unha impresora 3D como mellorar o dominio do inglés.

O motor é o Centro de Centro de Desenvolvemento Local (CDL), que ten alí a súa sede desde hai catro anos e canaliza unha ampla oferta formativa, tamén en fin de semana. Por alí pasan centos de persoas ao ano e onte coincidiron sesenta alumnos para participar en catro cursos: piloto oficial de drons, licenza de navegación, carretilla elevadora e caixeiro repoñedor. Chegaron, sobre todo, de concellos do Salnés e Barbanza, pero tamén de Vigo, A Coruña, Santiago, Baiona, Ponteareas, Nigrán, Caldas, Tui, Pontevedra, Moaña e mesmo de Avilés.

Os cursos conxugan teórica e práctica, de xeito que os alumnos tan pronto teñen que tomar apuntes como saen ao xardín do pazo para aprender a manexar un dron ou baixan ao porto para poñerse ao temón dunha embarcación.

Oferta variada

A actividade do CDL exténdese aos sete días da semana. Nas mañás de luns a venres impártese un curso de mercadotecnia e comercio internacional ademais das clases do obradoiro de emprego, que conta con dos módulos, de redes e xardinería.

Polas tardes, escolares de toda a comarca reciben formación de novas tecnoloxías, e as fins de semana teñen lugar cursos de diferentes sectores laborais, ata sumar máis de vinte especialidades diferentes. Ademais, nos próximos días comezará a cuarta edición da «aceleradora de empresas?coworking» da Xunta, na que van participar emprendedores das provincias de Pontevedra e A Coruña, e retomarase a actividade no viveiro de empresas.

A axenda é intensa e o espazo é limitado, por iso no Concello traballan xa coa previsión de acometer unha nova ampliación das instalacións «co obxectivo de favorecer a inserción laboral dos desempregados vilanoveses, centrándose de maneira especial nos mozos e nós colectivos de desempregados de longa duración», segundo apuntan desde a concellería de Promoción Económica e Industria, que dirixe o popular Javier Tourís.

O edil destaca «o gran traballo que se está a realizar desde o CDL, converténdose en pouco tempo nun centro de referencia que estende a súa influencia máis alá do ámbito comarcal».