Gustavo César Veloso pechará a súa carreira nas filas do W52-F.C. Porto

Ciclismo Asina a súa oitava tempada no equipo, di, cun toque de «romanticismo», e a idea de gozar correndo cada carreira «como a última» e despedíndose na Grandíssima

Paulo Maria (Cedida)

vilagarcía / la voz

Gustavo César Veloso despediráse como corredor profesional vestido de dragón. Defendendo nas estradas as cores do W52-F.C. Porto, a que será por quinto ano a denominación dunha estrutura de equipo na que o corredor vilagarcián vivirá a súa oitava tempada desde o seu regreso ao pelotón luso o 2013, cos títulos de gañador da Volta a Portugal do 2014 e do 2015 no seu palmarés.

«Despois de estar barallando diferentes opcións, renovei contrato co W52-F.C. Porto», confirmou onte Veloso. «Pensei en ir a unha estrutura máis pequena, e ensinarlles a corredores máis novos, ou terminar a miña carreira aquí. Pero sendo o último ano que vou correr, e tendo en conta que levo aquí, na mesma estrutura, sete anos, hai uns afeccionados detrás do club, detrás de min»; por iso, «polo romanticismo», e porque «o patrocinador, e toda a xente do equipo me dicían que tiña que acabar a miña carreira na que é a miña casa», foi polo que, explica o ciclista de Bamio, optou por quedar nunW52-F.C. Porto que priorizou o alacantino Raúl Alarcón e a gran promesa portuguesa João Rodrigues como bazas para conquistar as tres últimas edicións da Volta a Portugal.

O gañador da Volta a Catalunya 2008 e dunha etapa da Vuelta a España 2009 trasladoulle ao patrocinador do seu de novo equipo que «quero correr a Volta a Portugal, despedirme dela», pero só «sempre que dea o nivel. Se non, eu serei o primeiro en apartarme». E é que se ben Veloso manifesta que «quero chegar á Volta mellor ca nunca», tamén é consciente de que «os anos están aí, e cada vez custa máis». Dío, con todo, logo de rematar terceiro na última edición, que liderou durante varias etapas ata que unha caída nunha das chegadas por unha mancha de aceite, e o precario respaldo ofrecido polo seu equipo o día seguinte, lle impediron defender o xersei amarelo.

O equipo baixa a Continental

Máis aló da Volta, o arousán declara que a súa folla de ruta na tempada de despedida pasa por «gozar durante todo o ano de cada carreira, de cada momento, sen pensar nos resultados. Correndo cada proba sabendo que vai ser a última vez que a faga». Subliña, «sempre ao servizo do equipo, como un profesional, coma sempre».

O W52-F.C. Porto baixa este ano de continental-profesional a de novo categoría continental, a terceira e última do pelotón profesional. Gustavo comenta que, ao final, «estar na segunda categoría non nos abría as portas a ningunha das voltas e clásicas grandes, porque precisas moitos puntos. E a nós», engade, «non nos vai cambiar moito o calendario. O ano pasado a única volta Pro-Tour que fixemos foi a de Turquía, á que só foron cinco equipos Pro-Tour, e xa non o será no 2020». O groso do último calendario do vilagarcián, sinala, será peninsular.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Gustavo César Veloso pechará a súa carreira nas filas do W52-F.C. Porto