Un pequeno malentendido deu pé ao bloqueo do Arousa no reparto da liña de axudas directas da Fundación de Deportes de Vilagarcía
17 oct 2019 . Actualizado a las 21:00 h.O Arousa é xa un habitual no normalmente curto listado de clubs excluídos do reparto anual da subvención da Fundación de Deportes. Por dúas veces quedara fóra do mesmo a comezos da década, cando o seu actual presidente, Manolo Abalo, xestionaba a absorción dun cuarto de millón de euros de débeda herdada da presidencia de José Manuel Gómez. E máis recentemente, noutras dúas ocasión, por erros na tramitación administrativa. Desta volta, explica o propio Manolo Abalo, o problema naceu dun pequeno pasivo duns 11,50 euros do Arousa con Facenda, froito dun malentendido. O retraso nun par de días do pagamento por parte da entidade deportiva tería coincidido, comenta o mandatario arousista, coa solicitude pola Fundación de Deportes do documento acreditativo de estar libre de cargas con calquera administración pública.
Sendo que dita débeda irrisoria foi subsanada tras o peche do prazo de presentación de documentación ante a Fundación, pero antes do acordo do Consello Reitor respecto ao reparto da súa liña de axudas, Manolo Abalo informou onte de que o Arousa recurrirá a súa exclusión, confiando plenamente en que ao final entrará no reparto dos 82.000 euros municipais.
Na mesma liña se manifestaron onte desde o Atlético Arousana, atribuíndo a desestimación da súa solicitude de inclusión na distribución da subvención a un problema menor no redactado, que non na documentación, da memoria de ingresos e de gastos esixida pola Fundación. Por iso recurrirán ante o Concello para recibir a súa parte dos 82.000 euros.