Campos, Romero e Álvarez abren o camiño de España ao Mundial de China

Os breoganistas adiántanse dous días á selección na viaxe a Shaoxing


vilagarcía / la voz

Mañá, ás 9.25 horas, Tono Campos, Diego Romero, Tania Álvarez e a luguesa do Kayak Tudense Tania Fernández iniciarán no aeroporto vigués de Peinador unha longa viaxe de máis de 24 horas con destino a China, onde teñen previsto aterrar a iso das catro da tarde do venres previas escalas en Madrid e Doha (Catar), e chegada a Hangzhou, a megalópole de case 10 millóns de persoas situada no leste do xigante asiático, e a media hora de Shaoxing, a localidade na que se disputará o Campionato do Mundo de Maratón entre os días 17 e 20 do presente mes. Os ases do Breogán do Grove, Campos, Romero e Álvarez, xunto coa compañeira desta última no K2 Sénior Feminino, decidiron adiantarse en dous días ao resto dos integrantes da ampla selección española inscrita na cita, que partirá o sábado desde Madrid nun voo directo a Shanghai, cos canoístas xuvenís do Náutico Pontecesures Javier Ordóñez Muñiz e os irmáns Iago e Iria Romero Rey na expedición.

A decisión de adiantar 48 horas a viaxe respecto aos seus compañeiros de equipo nacional obedece, explicaba onte Tono Campos, á intención de «adaptarse mellor ao cambio de hora», con 6 de diferenza entre Shaoxing e O Grove. Unha necesidade que o propio Campos constatou no Mundial do 2011 disputado en Singapur, cita na que na proba de C1 «me gañara un alemán que nunca antes me gañara, que nunca máis o volveu facer, e que levaba máis tempo de adaptación aló», recorda o meco.

Campos e Romero aspiran a reunir tres medallas cada un, competindo na proba curta (3,6 quilómetros), que se estrea no programa do Mundial e na que tamén figura inscrita a súa compañeira kaiakista, e mais nas regatas longas da canoa sénior individual e de dobres (26,4 quilómetros). No caso do primeiro, sería o seu segundo dobrete, logo de aproveitar a estrea da distancia curta no último Europeo, converténdose no primeiro subcampión continental da modalidade antes de colgarse o ouro no C1 e o bronce con Romero no C2. Campos defenderá en Shaoxing o título mundial na canoa individual, e Romero o do C2, que conquistaba un ano atrás en Portugal xunto co pontevedrés Óscar Graña, desta volta acompañado polo tudense Pedro Areal.

Levantándose ás 3 da mañá

Con todo, Tono Campos non agardou a chegar a China para iniciar a súa adaptación. Esta semana comezou a erguerse ás 3 da madrugada, as 9 da mañá en Shaoxing, para ir adaptando o reloxo biolóxico do seu corpo e afinando a súa activación desde primeira hora do día durante a celebración do Mundial. A cita de Singapur no 2011, e a súa asistencia convidado xunto a outras estrelas do maratón internacional a Hangzhou no 2012 para unhas regatas amigables, sérvenlle a Campos de referencias para trazar o camiño máis seguro cara ás medallas en China. De aí que saiba tamén da importancia de afacerse ben ao alto nivel de humidade ambiental.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Campos, Romero e Álvarez abren o camiño de España ao Mundial de China