Veloso presenta credenciais á xeral da Volta a Portugal calcando o tempo do gañador da prólogo

Finalizou a 19 centésimas do seu compañeiro  Samuel Caldeira


vilagarcía / la voz

Declaraba na véspera Gustavo César Veloso que chegaba ben á nova edición da Volta a Portugal. E en canto tivo ocasión, ofreceu a primeira demostración de que así é. Na súa especialidade, a contrarreloxio, o vilagarcián calcou nos 6 quilómetros do trazado urbano de Viseu o mesmo tempo do gañador do día, o seu compañeiro Samuel Caldeira. O esprinter luso, único supervivinte xunto ao propio Veloso daquela primeira versión da actual estrutura do W52-F.C. Porto que abrira os seus seis últimos anos de tiranía na xeral da Grandíssima, cubría o percorrido en 7 minutos, 28 segundos e 13 centésimas. O vilagarcián facíao en 7.28.32, co líder do Swiss Race Academy suízo Gian Friesecke colándose entre ambos en 7.28.27.

Thibault Guernalec (Team Arkea Samsic) foi cuarto a 1 segundo, con outros dous homes do W52-F.C. Porto ocupando espazo entre os dez primeiros clasificados: António Carvalho, quinto a 4 segundos dos tres primeiros, e Daniel Mestre, décimo a 8. Entre ambos os dous, Mikel Aristi (Murias), sexto a 6 segundos, Cyrille Thièry (Swiss R.A.), sétimo a 7 segundos, como Joni Brandão (Efapel), o sobre o papel rival directo de Veloso pola xeral mellor colocado, no oitavo posto xusto por diante de João Matias, a 8 do primeiro líder da Volta a Portugal.

Pouco despois de chegar á meta, Gustavo César declarou que «tentei minimizar os riscos» sobre un trazado que combinaba asfalto e empedrado de diferentes dimensións, retorcido en curvas e algún que outro tobogán. «Fun a morte onde se podía ir ben, e nas 2-3 curvas onde podía perder, non arrisquei», explicou, ao tempo que se alegraba do triunfo do seu compañeiro no mesmo escenario onde Gustavo gañara a contrarreloxio que pechara a Volta do 2017.

O xoves, primeira etapa en liña. 174,7 quilómetros con saída en Miranda do Corvo e chegada a Leiría cun porto de primeira, dous de cuarta e un de segunda nos cen primeiros quilómetros.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Veloso presenta credenciais á xeral da Volta a Portugal calcando o tempo do gañador da prólogo