O humorista Leo Bassi encabeza a quinta edición do festival de risa máis aclamado

O certame desenvolverase nas rúas da capital arousá durante cinco días de agosto


O Festaclown xa é cita obrigada para todos os vilagarciáns e os visitantes famentos de diversión. Dende o 17 ata o 21 de agosto, a localidade arousá acollerá a quinta edición do seu festival máis consolidado. A risa e a solidariedade volverán ser as grandes protagonistas, durante cinco días, dun evento que leva vinte anos percorrendo países de todo o mundo, e que pretende contribuír á actividade cultural dos diferentes lugares que visita, ademais de facer visible o labor de varios colectivos sociais.

O prato forte do Festaclown, que muda a súa denominación para resaltar a súa identidade galega, será o estreo, en Galicia, do espectáculo «Yo, Mussolini», protagonizado polo cómico Leo Bassi. Con esta obra, o italiano persegue desmontar o fascismo, movemento que «necesita miedo para funcionar», así como defender o poder da risa, «un arma política muy importante».

Completan o programa de actuacións unha serie de artistas e compañías circenses e teatrais do panorama nacional e internacional. Mago Teto, «un dos mellores magos do país», segundo afirman dende a iniciativa Culturactiva, estará o 20 de agosto na praza do Castro, igual que a compañía clown Sempre Arriba, que actuará o domingo 18. Tamén realizará a súa función o domingo o grupo teatral Vol’e Temps, tres veces galardoado en Andalucía. Ademais, chegarán ás rúas de Vilagarcía figuras como o mago zamorano Miguel de Lucas, a actriz madrileña Mireia Miracle ou a compañía vasca Aimar & Cía.

Aínda que o Festaclown non se inaugura ata o sábado 17, Vilagarcía xa carga as pilas cunha actuación mañá, ás 20 horas no Salón García, do taller de teatro Clámide en colaboración coa asociación Con Eles. O Concello dá inicio, así, a unhas xornadas de gozo e con fins benéficos.

Leo Bassi estrea «Yo, Mussolini», o seu espectáculo contra o fascismo

19, 20 e 21 de agosto • De nde as 11 horas • Vilagarcía • A música será a gran protagonista do luns 19, co concerto da agrupación Píscore, que presentará a súa fusión musical na praza de Galicia, ás 13 horas, e na praza do Castro, ás 20 horas. A madrileña Mireia Miracle ocupará a praza de Galicia, ás 21.30 horas, co seu espectáculo, «Rojo».

O martes 20 chegará o Mago Teto coa súa función «Alquimia», que levará a cabo ás 13 horas na praza de Galicia, e ás 20 horas na praza do Castro. Os vascos Aimar & Cía estarán na praza de Galicia ás 21.30 horas.

E como o mellor debe deixarse para o final, o mércores resérvase para o humor do italiano Leo Bassi, que fará doblete no Festaclown, cunha conferencia no auditorio, «El teatro como herramienta política», ás 12 horas, e co estreo en Vilagarcía da función «Yo Mussolini», ás 21 horas.

O ilusionista Miguel de Lucas e a compañía Muu inauguran o ciclo

17 e 18 de agosto • 12 horas • Vilagarcía • Vilagarcía iniciará o Festaclown co espectáculo circense da compañía galega Muu, chamado «Crunch!», o sábado 17 ás 13 horas, na praza da Independencia, actuación que repetirá o mesmo día, ás 20 horas, na praza do Castro.

O primeiro día do festival continuará con circo e teatro na rúa, da man de Kote Malabar, que estará ás 19 horas na rúa Rei Daviña. Pola noite, será o mago zamorano Miguel de Lucas quen amenizará o fin de xornada coa súa demostración, «OLE!», ás 21.30 horas na praza de Galicia.

O domingo, a humorista Patty Diphusa mostrará a súa destreza cos malabares ás 13 horas na praza da Independencia, e ás 19 horas en Rei Daviña. A compañía galega de clown Sempre Arriba actuará na praza do Castro ás 20 horas, e Vol’e Temps estarán ás 21.30 na praza de Galicia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O humorista Leo Bassi encabeza a quinta edición do festival de risa máis aclamado