O meisino competirá no K-4 1.000
04 abr 2019 . Actualizado a las 05:00 h.O primeiro proceso selectivo da Real Federación Española de Piragüismo para cubrir as prazas dos equipos cos que competirá este ano preolímpico a nivel internacional encadeou a súa segunda xornada de boas novas para o piragüismo arousán. Logo da agardada consecución o martes no encoro asturiano de Trasona dos pasaportes para a Copa do Mundo de Duisburgo e dos Xogos Europeos no K-1 200 feminino por parte de Teresa Portela, a canguesa afincada no Grove, e do sobresaínte segundo posto da meca do Breogán Natalia García; onte Iago Monteagudo fíxose cun asento no K-4 1.000 co que España acudirá en agosto ao Mundial Absoluto, a primeira cita internacional sénior na carreira do padexeiro meisino do Naval de Pontevedra.
Así llo confirmou o seu adestrador tras asinar un gran quinto posto na final A do K-1 1.000 en Trasona, para a que se clasificara o día anterior, e que completou en 3.51,883. A 4,108 segundos do gañador, o castelán-manchego Paco Cubelos; pero o que é máis importante, a só un posto e 160 milésimas do asturiano do Kayak Tudense Pedro Vázquez, que gañou a praza do K-1 1.000 para o Mundial Sub-23.
A outra arousá en acción onte en Trasona, Camila Morison, rematou xunto a Estefanía Fernández sexta e última na final pola praza en Duisburgo e nos XX.EE no K-2 500 feminino.