Uxía, María Fumaça e Levedinski repiten

Para os cativos haberá cine e música, terán o habitual desfile dos Papá Noel e a cabalgata e non faltará a visita do apalpador


 O Nadal na Illa vai dar moito de si. O Concello elaborou un programa de actos no que o auditorio municipal vai xogar un papel protagonista. O 2018 foi o ano do décimo aniversario, e esta efeméride tampouco vai pasar por alto nestas festas. Carlos Blanco abriu o calendario de actuacións o 2 de xaneiro e o peche corresponderá a outra habitual deste escenario, a cantante Uxía. Actuará o día 29 (21 horas) e farao acompañada dunha banda de sete músicos de primeiro nivel.

Uxía acompañou onte ao alcalde e a concelleira de Cultura para dar conta da oferta lúdica e cultural do Nadal. O programa abrirase este sábado (18 horas) cun festival da Escola municipal de música da Illa; continuará o sábado seguinte (12 horas) cunha sesión Sumo, unha sorte de sesión vermú musical dirixida aos pequenos da casa; o venres día 28 (17.30 horas) os nenos volven estar convocados no auditorio, desta volta para ver a película «Tropa a trapo na Selva do Arco da Vella».

O venres 21 de decembro, xa en tempo de vacacións escolares e como é habitual, o ambiente festivo trasládase ás rúas co desfile do ducias de Papá Noel, e o día 27 será a visita do apalpador ou a apalpadora, que percorrerán a provincia da man da Deputación de Pontevedra.

O público familiar aínda terá por diante outra cita importante, a dos músicos e cantantes de María Fumaça, que volven cruzar a ponte, onde sempre son recibidos cos brazos abertos. Actuarán o 4 de xaneiro, ás sete da tarde no auditorio municipal, con entrada a 6 euros.

Outra actuación destacada do cartel do 2018 é a de Sonia Lebedynski, que tamén repite na Illa o día 21, logo de ter actuado no ciclo Cultura nos Cons do pasado verán.

Todas as actuacións, agás o festival da escola de música, son de pago. Como é habitual, as entradas pódense mercar de xeito anticipado no bar O Museo, na administración de lotería San Xulián e na tenda Gradisela. O día das actuacións, no propio auditorio.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Uxía, María Fumaça e Levedinski repiten