«As mulleres teñen que saber que o seu traballo é vital para o sector»

Esta tarde, Foro Voz para darlle a volta ao mar, no auditorio da Xuventude, en Cambados

.

cambados / La voz

maría álvarez lires

A traxectoria de María Álvarez Lires apunta, sempre, cara un obxectivo: a igualdade. Esta profesora do departamento de Didáctica das Ciencias Experimentais da Universidade de Vigo é autora do traballo «As mulleres na pesca. Faenando cara a igualdade», no que analiza a invisibilidade que arrodea ás mulleres do mar.

-Hai moitas. E, sen embargo, parece que só hai mariscadoras...

-O caso das mariscadoras ten unha explicación. A finais dos anos noventa, conseguiron un grado de asociacionismo interesante. Acadaron organizarse, son un sector de mulleres empoderadas... Polo demais, as mulleres son invisibles na sociedade de hoxe en día, e no mar tamén. Se a iso lle sumamos que o mar tamén é invisible, e que o traballo que a muller desenvolve en terra, pero vencellado ao mar, tampouco se ve, sumamos ata tres invisibilidades. E é así como nos atopamos nesta situación de ocultación do traballo das mulleres, de diferenzas de salarios...

-É sorprendente o caso das bateeiras. Hai moitas mulleres no sector do mexillón, pero non se ven. Non están nos órganos de decisión.

-Sigue existindo un machismo e un sexismo feroz. Os sectores máis masculinizados resístense a ceder a toma de decisións.

-Será a toma de decisións, porque o traballo das mulleres é aceptado a bordo.

-Claro. Os traballos na casa, e de coidados da familia, son cousa das mulleres, e socialmente non se lles dá importancia ningunha. Cando fixemos o estudo, unha redeira díxonos que a xente pensa que os peixes saltan sós a bordo. Ninguén pensa que detrás hai unha redeira facendo e reparando as redes, un traballo que é fundamental para a viabilidade da flota. É preciso que o traballo das mulleres sexa recoñecido, e o camiño cara ese obxectivo debe de ser o asociacionismo. Hai que fomentar movementos asociativos para aumentar a voz, a presenza das mulleres en foros e espazos de decisión.

-Dicía que as mariscadoras forman un colectivo de mulleres empoderadas. Non embargantes, hai moitas que seguen a ver o seu traballo como un simple «complemento» á economía familiar.

-Non só as mariscadoras. Hai mulleres que desempeñan traballos de xerencia en empresas relacionadas co mar, e cando lle preguntas en que consiste a súa labor din «axudo a». Cando lle fas a mesma pregunta ao home, a resposta non vai por aí. Isto forma parte da educación que reciben as mulleres, que se acostuman a adoptar un papel subordinado. As mulleres teñen que tomar conciencia de o seu non é un traballo subsidiario, senón fundamental para a supervivencia do propio sector. Se non hai mariscadoras, non hai marisco que enlatar.

-Falaba do asociacionismo como maneira de darlle a volta a esta situación. ¿Hai outras liñas de actuación que axuden?

-Hai moitas cousas que facer. Plans de igualdade, de sensibilización, de formación. Hai que mellorar a autoestima das mulleres. E hai outros factores a ter en conta. Por exemplo, facendo as nosas investigacións atopámonos con que faltan moitos datos desagregados por sexo e con indicadores de xénero.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«As mulleres teñen que saber que o seu traballo é vital para o sector»